W aktualnej debaće wo Serbskim sejmje je so tež dźěłowy kruh SPD „Serbja“ słowa jimał. Jeje 1. rěčnik Benedikt Dyrlich pisa w nadawku kruha:

Tuchwilu kursěruja w zjawnosći dosć rozdźělne měnjenja k wólbam prěnjeho, swobodneho a tajnje woleneho serbskeho ludoweho zastupnistwa Serbski sejm. Mjeztym zo tójšto wuznamnych Serbow, kotřiž maja zasłužby hladajo na serbsku rěč a kulturu a so dale za to angažuja, naležnosće sejma podpěruja, spytaja někotři wodźacy zastupnicy Domowiny a politiki w Drježdźanach a Podstupimje kaž tež we Łužicy nowe reformowe hibanje mjez nami Serbami za wjace demokratije a sobupostajowanje zaborzdźić, rysujo je jako „njerealistiske“ a „přećiwo Domowinje“ měrjace so. Ignoruja při tym, zo běchu nimale wšitcy iniciatorojo a podpěraćeljo „Njebjelčanskeho apela“ a kandidaća a kandidatki za 1. sejm wjelelětni a jara aktiwni čłonojo Domowiny abo to hišće su, hdźež so w bazowych towarstwach konkretnje na polu kultury a kubłanja angažuja.