Berlin (SN/MkWj). Parlamentariska přirada Załožby za serbski lud ma noweho městopředsydu. Čłonojo gremija, zapósłancy krajneju sejmow Sakskeje a Braniborskeje a Němskeho zwjazkoweho sejma, su na swojim posedźenju minjeny pjatk w Berlinje Klausa-Petera Schulzu do zastojnstwa wuzwolili. Schulze je zapósłanc CDU w zwjazkowym sejmje a bě wjele lět Grodkowski měšćanosta.
Předsyda parlamentariskeje přirady, zapósłanc CDU w Sakskim krajnym sejmje Marko Šiman, je z nowej personaliju jara spokojom. „Jako bywši měšćanosta je Klaus-Peter Schulze z wobstejnosćemi regiona wusko zwjazany a so tež jara za serbske naležnosće zasadźa“, rjekny Šiman našemu wječornikej.
Na dnjowym porjedźe stejachu mjez druhim nowe jednanja mjez Sakskej, Braniborskej a zastupnikami Zwjazka wo financowanju załožby, kotrež su so wčera w Podstupimje zahajili. Přirada je w tym zwisku namołwjała, přidatne srědki něhdźe 600 000 eurow za digitalizaciju nałožić, zo bychu nowe techniske móžnosće za wužiwanje serbskeje rěče w modernych medijach nastali.