Polěpša poskitki bliskowobchadnych srědkow w Hornjej Łužicy

Drježdźany (SN/BŠe). Wjacore naprawy, kotrež bě wuhlowa komisija njedawno w swojej kónčnej rozprawje namjetowała, zaběraja so mjez druhim z lěpšej mobilitu w regionje. Tež wobchadny zaměrowy zwjazk Hornje Łobjo (VVO), kotremuž zapadna Łužica z městomaj Kamjencom a Wojerecami přisłuša, widźi w někotrych idejach šansu, swoje bliskowobchadne zaměry spěšnišo zwoprawdźić. „Loni w meji smy našu ideju wo spěšnoželeznicy Łobjo-Łužica předstajili, zo móhli za dalše postupowanje zwjazkowe financne­ srědki dóstać“, rozłožuje jednaćel VVO Burkhard Ehlen. „Z elektrifikaciju železniskeje čary mjez Drježdźanami a Zhorjelcom kaž tež Drježdźanami a Kamjencom budźe zakład wutworjeny, zo móhli tam spěšnoželeznicu zasadźić“, jednaćel wuswětla. To pak su daloko do přichoda sahace plany. Hladajo na planowanu wjetšu spěšnosć ćaha přez Rólany (Ruhland) abo Kamjenc do Wojerec so jězbny čas jasnje skrótši.