Drježdźany (SN). Sakski zapósłanc FDP w zwjazkowym sejmje Torsten Herbst je wobzamknjenje němskeho parlamenta nastupajo zapisanje wjelka do zwjazkoweho hońtwjerskeho zakonja kritizował. Zwjazkowy sejm bě z hłosami wulkeje koalicije minjeny tydźeń wotpokazał wjelka do němskeho hońtwjerskeho zakonja zapisać.
Torsten Herbst nětko w nowinskej zdźělence informuje: „Wotpokazowace nastajenje unije a SPD k zapisanju wjelka do zwjazkoweho hońtwjerskeho zakonja je strašna forma zapowědźenja woprawdźitosće. Bohužel su tež sakscy zapósłancy CDU a SPD w zwjazkowym sejmje z ‚ně‘ hłosowali. Bjezdwěla je zadomjenje wjelka wulki wuspěch za škit přirody a družin zwěrjatow w Němskej. Runje tak jasne pak tež je, zo trjeba spěšnje rozmnožaca so družina rubježnych zwěrjatow bjez přirodnych njepřećelow přichodnje rjadowanje přez hońtwjerske prawo. Hižo nětko je ličba wjelkow w dźělach Sakskeje a Braniborskeje sobu najwjetša po wšej Europje.“