W serbskich zarjadnišćach jenož dwě pjećinje wotrjadnikow mužojo
Budyšin (SN/at). Žony na wuchodźe Němskeje su w nawodnych pozicijach procentualnje husćišo zasadźene hač jich zapadoněmske koleginy. To wuchadźa z přepytowanja, za kotrež stej sćelakaj MDR a RRB z Uniwersitu Lipsk hromadźe dźěłałoj, rozprawja powěsćernja dpa.
Mjenowane přepytowanje je nastork, sej połoženje w serbskich institucijach raz bliže wobhladać. Po rešeršach Serbskich Nowin, kotrež złožuja so předewšěm na předstajenje institucijow w interneće a zdźěla na rozmołwy w 14 serbskich zarjadnišćach, dźěła tam na prěnjej a druhej runinje nawodnistwa dohromady 31 žonow a 23 muži. Prěnja runina su jednaćelki a jednaćeljo resp. zawodne jednaćelstwo, kaž w Němsko-Serbskim ludowym dźiwadle. Tam mamy jědnaće žonow porno wosom mužam. Druha runina su wotrjadnicy.
