Z hnydomnym programom zaruča zwjazkowe knježerstwo, hišće do schwalenja zakonskich zakładow za kónc wudobywanja brunicy z dźěłami za strukturnu změnu započeć.

Drježdźany/Podstupim (SN/at). Z prěnim paketom 240 milionow eurow podpěruje Zwjazk strukturnu změnu we wot kónca wudobywanja brunicy potrjechenych krajach. „Nětko je puć swobodny, prěnje widźomne kroki do přichoda Łužicy a srjedźneje Němskeje hić“, zwěsća sakski ministerski prezident Michael Kretschmer (CDU). Wón rěči zdobom wo „cyle rozsudnej etapje za strukturne wuwiće“. Po słowach jeho braniborskeho kolegi Dietmara Woidki (SPD) „měł hnydomny program prawje spěšnje w regionach skutkować a potrjechenym ludźom pokazać, zo politikarjo lubjenja dodźerža a zo konkretnje jednaja“. Iniciatiwu k tomu bě Woidke loni napřećo zwjazkowemu financnemu ministrej Olafej Scholzej (SPD) nastorčił, kaž statnej kencliji w Drježdźanach a Podstupimje zdźělatej.