Sakska FDP nadźija so dźesać procentow

póndźela, 08. apryla 2019
artikl hódnoćić
(0 )

Drježdźany (dpa/SN). Sakska FDP je wuhibki za nawrót do krajneho sejma stajiła. Na krajnym zjězdźe w Drježdźanach su liberalni wčera jednohłósnje swój wólbny program schwalili. Tón předwidźi mjez druhim sylnjenje wyšich šulow, zjednoćenje pjeć zjawnowobchadnych zaměrowych zwjazkow na cyłosakski zwjazk ­a zniženje wólbneje staroby wot 18 na 16 lět.

Sobotu bě strona swoje předsydstwo znowa wuzwoliła. Při tym zepěrachu so na nazhonity personal. Wjelelětny předsyda Holger Zastrow wostanje krajny šef strony. Načolneho kandidata za wólby sakskeho sejma su delegaća 50. krajneho zjězda znowa za předsydu wuzwolili, byrnjež wón poměrnje zdźeržliwe přihłosowanje žnjał. 139 delegatow (64,4 procenty) hłosowaše za noweho stareho předsydu, 73 delegatow hłosowaše z „ně“, štyrjo so hłosa wzdachu. Napřećiwneho kandidata Zastrow žanoho njeměješe. Generalny sekretar wostanje Torsten Herbst ze 74,9 procentami.

wozjewjene w: Kraj a swět
Prošu přizjewće so, chceće-li komentar podać

Serbska debata

nowostki LND