Zapósłanc parlamenta EU z łužiskimi ratarjemi diskutował

Lejno/Konjecy (SN/MkWj). Ratarska politika Europskeje unije steješe w srjedźišću wopyta sakskeho zapósłanca Europskeho parlamenta dr. Petera Jahra (CDU) minjeny pjatk we Łužicy. W Döbelnje bydlacy Jahr, kiž skutkuje wot lěta 2009 w Europskim parlamenće, bě na přeprošenje serbskeho zapósłanca CDU w Sakskim krajnym sejmje Alojsa Mikławška do Łužicy přijěł.

Na spočatku wopyta 60lětny Jahr ratarski zawod Ralfa Hentzschela w Lejnje, w kotrymž produkuja tež symjo. Hentzschel bě lěta 1991 ratarski zawod staršeju přewzał a je jón zaměrnje dale wuwił. Dźensa předawaja symjo do 20 krajow po wšej Europje a samo hač do Łaćonskeje Ameriki. W rozmołwje z Jahrom sej Ralf Hentzschel přeješe, zo bychu sej ludźo dźěło burow zaso bóle wažili a na škit přirody z realistiskimi wočemi zhladowali. Přespěšnje so ratarjam wša wina za škody w přirodźe přisuwa.