Sakski krajny sejm naćisk Lěwicy za sylnjenje prawow Serbow wotpokazał
Drježdźany (SN). Sakski krajny sejm je na swojim wčerawšim posedźenju w Drježdźanach naćisk frakcije Lěwicy „Strategija jednanja k sylnjenju prawow Serbow – šansa za wuwiće Łužicy jako kompetencny region za europsku mjeńšinowu politiku w procesu strukturneje změny“ wotpokazał. K tomu rjekny serbski zapósłanc Hajko Kozel, wčera wječor w krajnym sejmje: „Chcemy, runje hladajo na strukturnu změnu, na wotewrjene prašenja nastupajo mjeńšinowu politiku skedźbnjeć a k rozmyslowanju pozbudźeć. Hrube wotpokazanje ze stron statneho knježerstwa nas zamyla, wšako smy ze swojim impulsom tež poziciji ministerskeho prezidenta wotpowědowali. Michael Kretschmer bě 4. julija 2018 w Budyšinje rjekł, zo njewěri, zo statne knježerstwo hišće w tutej wólbnej dobje serbski zakoń nowelěruje. Přiwšěm móhli wšitcy hižo nětko wo tym rozmyslować, što móhło so změnić. Potrjeba jednanja je wulka.