Strony nastupaja k wólbam Sakskeho krajneho sejma ze serbskimi temami
Budyšin (SN/at). Hač do poslednjeho wokomika wabja strony w Sakskej wo přichilnosć wolerjow. W dwurěčnej Łužicy budźe napjate, hač móžetaj kandidataj Marko Šiman a Alojs Mikławšk dotalny mandat zakitować. Wobaj za CDU w swojim wólbnym wokrjesu direktnje nastupitaj, Šiman steji nimo toho na krajnej lisćinje křesćanskich demokratow na městnje 19. Třeći serbski kandidat Hajko Kozel (Lěwica) žanu realnu šansu nima.
Ličba kandidatow-Serbow w stronach je skromna, wuprajenja nastupajo naš lud su CDU, Lěwica, SPD, AfD, Zeleni, FDP a Swobodni wolerjo w swojich knježerstwowych resp. wólbnych programach zakótwili. To pokazuje, zo chcedźa strony serbskich wolerjow přeswědčić. Tu podate přikłady nimaja narok dospołnosće.
