Drježdźany (SN/MiR). Pjeć serbskich projektowych idejow steješe wčera mjez dźesać kandidatami za publikumowe myto Sakskeho fondsa „Čiń sobu!“ we wobłuku Łužica. W cyłku bě wot 26. septembra­ do 6. oktobra wjace hač 3 000 hłosow po puću interneta wo dobyćerjomaj rozsudźiło. Serbski projekt njeje so nažel přesadźił, za to pak hrajkanišćo a wjacegeneraciski dom w Mikowje (Mücka).

Uta Waschnick, kotraž měješe ideju za Mikowski projekt, rjekny: „Nimamy pola nas žanu móžnosć, zo so ludźo wšelakich generacijow zetkawaja. To móhło so nětko změnić. Ideja bě skerje spontana. Mjeztym so někotři młodźi ludźo za projekt angažuja.“ Kelko aktiwnych to je, njewědźeše Waschnick na naprašowanje rjec. Z pjenježnym mytom 15 000 eurow chcedźa nětko jako prěnje klasiske hrajkanišćo twarić. Wšako tajke za tuchwilu 145 dźěći we wsy dotal hišće nimaja. „Derje wopytane hrajkanišćo móže być zakład sociokulturelneho centruma gmejny a tak zdobom za wjacegeneraciski dom“, Uta Waschnick potwjerdźi.