Klimje škodźace emisije na najnišim stawje po załoženju Braniborskeje
Choćebuz (dpa/SN). Wustork klimje škodźaceho wuhlikoweho dioksyda je w Braniborskej na najnišim stawje wot załoženja zwjazkoweho kraja, kaž tamniši wobswětowy zarjad informuje. Z emisiju něhdźe 53,5 milionow tonow wuhlikoweho dioksyda je kraj loni wo 39 procentow mjenje płuna do atmosfery wustorkował hač w lěće 1990. Niski staw je po zdźělenju Podstupimskeho ministerstwa předewšěm sćěh zawrjenja dweju blokow Janšojskeje milinarnje. Brunicowa milinarnja w Janšojcach je třeća najwjetša milinarnja Němskeje.
Janšojskej blokaj ze stajnje 500 megawattami wukonliwosće běchu 1. oktobra 2018 respektiwnje 30. septembra 2019 wotpinyli. Wonej matej přichodne štyri lěta jako wěstotna rezerwa słužić, zo njeby k njedostatkam při zastaranju z milinu dóšło. Potom chcedźa blokaj dospołnje wotpinyć. Energijowy koncern LEAG budźe wot zwjazkoweho knježerstwa wotpowědnje wotrunany.