Jednohłósny rozsud Sakskeho krajneho sejma
Drježdźany (SN). Sakski krajny sejm je na swojim wčerawšim posedźenju w Drježdźanach nowu Radu za serbske naležnosće wuzwolił. Jej přisłušeja kandidaća Domowiny Julian Nyča, Diana Šołćina, Dawid Statnik, Marko Suchy a Marko Kliman, kiž kandidowaše na namjet Sakskeho zwjazka městow a gmejnow. Při zjawnym wothłosowanju wuprajichu so zapósłancy sejma jednohłósnje za wšitkich pjeć namjetowanych. Rada za serbske naležnosće ma so słyšeć hladajo na wšitkich Serbow nastupace temy, zakonske iniciatiwy, změny zakonjow abo naprašowanja.
