Křesćanscy demokraća přihotuja najebać koronu zjězd w decembrje
Berlin (dpa/SN). Prezidij CDU chce najebać přiběrace ličby z koronawirusom natyknjenych ludźi spočatk decembra planowany stronski zjězd k wuzwolenju noweho předsydy w Stuttgarće přewjesć. Tuchwilu pandemije dla wjacore scenarije rozwažuja a planuja, wčera ze stronskich kruhow rěkaše. Zwjazkowa kanclerka Angela Merkel (CDU) mjenowaše najnowše ličby koronainfekcijow „přičinu k starosćenju, ale wobknježomne“. Tuž njeje po jeje měnjenju móžno, dalše wobmjezowanja zběhnyć. To płaći wosebje tež za koparske hry.
Ličby koronainfekcijow běchu naposledk zaso přiběrali. Kónc minjeneho tydźenja bě Roberta Kochowy institut wšědnje wjace hač 1 400 nowych infekcijow registrował.