Drježdźany/Budyšin (SN/JaW). Sakska přihłosuje nowemu, štwórtemu dojednanju wo financowanju Załožby za serbski lud, je sakski kabinet wobzamknył. Wo tym informowaše wčera připołdnju sakska ministerka za kulturu a turizm Barbara Klepsch (CDU) na nowinarskej konferency w sakskej stolicy.

Kaž ministerka rozłoži, běchu so wšitcy třo partnerojo na zakładźe přizjewjenja pjenježneje potrjeby załožby do toho na wobjim financowanja dojednali. „Spěchowanska suma – a měnju, zo je to jara dobre znamjo – bu, přirunujo z třećim dojednanjom, wo cyłkownje 5,3 miliony na 23,92 milionow eurow wob lěto zwyšena. Podźěl Sakskeje při tym na 7,9 milionow eurow (+1,77 mio.) lětnje stupa“, Barbara Klepsch wuwjedźe. Wjetšinu załožboweho etata zawěsća po dojednanju Zwjazk z 11,96 milionami eurow (+2,66 mio.); 3,99 milionow eurow (+0,89 mio.) přida Braniborska. Trěbne srědki su w dwójnym etaće Sakskeje za lětsa a klětu zapisane. Krajny sejm ma tomu hišće přihłosować.