Gmejny zarjadniskeho zwjazka pak so znowa jako bašta CDU wopokazali
Budyšin (SN/BŠe/at). W hornjołužiskimaj wólbnymaj wokrjesomaj (WK) je AfD z wotstawkom najsylniša politiska móc. We WK 156 docpě wona 31,9 proc. wotedatych druhich hłosow, 32,5 proc. bě to we WK 157. Hakle z 18,6 resp. 18,3 proc. slěduje CDU na druhim a SPD z 17,0 resp. 16,9 proc. na třećim městnje.
Karsten Hilse (AfD) z Łaza zastupuje WK 156 Budyšin I dale z 33,4 procentami prěnich hłosow (porno 2017 +0,2) direktnje w zwjazkowym sejmje. Jeho najsylniši konkurent Roland Ermer (CDU) z Njedźichowa je z 26 procentami (-4,5 proc.) znowa podležał. We WK 157 Zhorjelc I je předsyda AfD Tino Chrupalla mandat z 35,8 proc. (-0,3) zakitował.