Turówska brunicowa jama w krajowym třiróžku Němskeje, Pólskeje a Čěskeje wostanje předmjet wadźeńcy. Čěska bě samo přećiwo jeje rozšěrjenju skoržiła. Tež w Sakskej je tale jama dwělomna.

Drježdźany (dpa/SN). Strona Lěwica sakskemu knježerstwu bjezskutkownosć dwělomnu brunicowu jamu Turów w krajowym třiróžku nastupajo wumjetuje, kotraž wupřestrěwa so po pólskim teritoriju blisko města Žitawy. „Hač jedna so wo dnownu wodu, kwalitu wody abo spadowanje pódy w Žitawskej kónčinje: statne knježerstwo za trěbne nima, so w dosahacej měrje z wuskutkowanjemi jamy zaběrać, město toho zamući a łži“, rozłožuje zapósłanča Sakskeho krajneho sejma Antonia Mertsching. Knježerstwo region sebi samomu přewostaja a trěbne přepytowanja njenastorči.