Dr. Christoph G. Schmidt rozłoži friziske aspekty za nowelu němskeho mjenoweho prawa

Na zwjazkowej runinje tuchwilu nowelu němskeho mjenoweho prawa přihotuja. Nimo mnoholičbnych zjednorjenjow je tam wuraznje tež předwidźane, zo smědźa w zmysle mjeńšinoweho škita mjena serbskeho abo słowjanskeho pochada wotnětka tež oficialnje w žónskej warianće zapisać. Tak je to w słowjanskich rěčach uzus. Njepředwidźane pak dotal njeje znowapřizwolenje jónu zakazanych mjenowych konwencijow tamnych připóznatych mjeńšin, konkretnje tajke Frizow.