Hižo před 20 lětami je so zwjazkowa republika zawjazała, železnisku čaru do Zhorjelca a Žitawy wutwarić. Dotalna bilanca je strózba. Komunalni politikarjo chcedźa ćišć zwyšić.

Biskopicy (UM/SN). Nošerjo politiskeje zamołwitosće Hornjeje Łužicy so přiběrajcy boja, zo budźe region wobchadne přiwjazanje nastupajo wotpójsnjeny. A to, byrnjež we wobłuku tak mjenowaneje změny strukturow so wšitko polěpšić měło. Wutwar awtodróhi A 4 mjez Drježdźanami a Zhorjelcom na šěsć čarow je najprjedy wotprajeny, a tež při elektrifikaciji železniskeje čary mjez woběmaj městomaj, runje tak mjez Drježdźanami a Žitawu, ničo njepostupuje. Wčera je Biskopičanski wyši měšćanosta Holm Große (njestronjan) přeprosył, zo bychu za wobě železniskej čarje „bubnowali“. Městnosć podawka běše Biskopičanske dwórnišćo, na kotrymž so wobě trasy do směra krajneje stolicy zjednoćitej.