Ewangelska Serbowka Marja Simonowa je w 19. lětstotku sobu zakłady połožiła za dźensniše skutkowanje Čerwjeneho křiža a za moderne hladanje chorych. Rodźena 1824 do serbskeje Janašec swójby w Dobruši pola Budyšina ćehnješe jako młodostna na słužbu do Drježdźan. Tam wuda so na zamóžiteho tekstilneho překupca Simona a dźěłaše sobu w jeho wobchodźe na Starym torhošću.

We wójnje 1866 poda so do Čech, hdźež pomhaše lacarety załožeć a ranjenych zastarować. Na to powoła ju sakska kralowna Carola do direktorija Albertskeho towarstwa, w kotrymž přewza nawodnistwo wukubłanja hladarkow.

We wójnje 1870/71 znowa jako samaritka skutkowaca bu po wšej Němskej jako „mać Simonowa“ znata. Po wójnje wuda knize wo teoriji a praksy swojeho skutkowanja a załoži w Loschwitzu hladarnju za inwalidow „Deutsche Heilstätte“. Wospjet wuznamjenjena wona 1877 zemrě a bu z wulkej česću na pohrjebnišću swj. Trojicy w Drježdźanach-Johannstadće pochowana. Po serbskej samaritce rěka w Drježdźanach-Loschwitzu dróha „Marie-Simon-Straße“, tež hladanske towarstwo a cyłoněmske myto stej po njej pomjenowanej.