Jan Budar: „Swět njeje jenož čorny a běły, tež serbski nic“

Budyšin/Chrósćicy/Slepo (SN/mb). Serb­- ske Nowiny, Załožba za serbski lud a Sakska krajna centrala za politiske kubłanje (SLpB) wuhotuja klětu pod hesłom „Serbska debata“ rjad zjawnych zarjadowanjow. Na to staj so zastupjerjej redakcije ze SLpB a załožbu na rozmołwje w Ludowym nakładnistwje Domowina (LND) krótko do hód dojednałoj. SLpB so hižo dlěši čas wo to prócuje, „politiske kubłanske zarjadowanja wo aktualnych serbskich prašenjach poskićić“, kaž direktor dr. Roland Löffler zdźěli. Wón so wjeseli, „zo je so dźakowano dowěrypołnej kooperaciji ze Serbskimi Nowinami a Załožbu za serbski lud radźiło, klětu nalěto rjad rozmołwnych kołow poskićić.“

Prěnja podijowa diskusija so wutoru, 27. februara, w 19 hodź. w Slepom wotměje. Tema je: „Změna strukturow – što Serbja wočakuja?“ Naměstnik šefredaktora Axel Arlt budźe zarjadowanje moderěrować. Slepjanska kónčina je wot wudobywanja brunicy a jeho bórzomneho zakónčenja najbóle potrjechena.