Choćebuz (MH/SN). W parku Sprjewineje łučiny w Choćebuzu su minjeny pjatk wobšěrne zwučowanje přewjedli. Sta pomocnikow měješe nadawk, cyłkownje 93 zranjenych posudźować, zastarać a do chorownje mediciniskeje uniwersity dowjezć. Na wšěch 500 ludźi bě zasadźenych, pak jako dźiwadźelnicy, pak jako wuchowarjo.

We wobłuku zwučowanja napodobnichu scenarij, zo dyrbja ćežkeho hrimanja dla wulkozarjadowanje z 5 000 wustróžanymi wopytowarjemi přetorhnyć. Błyski běchu tójšto ludźi „zranili“, kotřiž bjez orientacije po swjedźenišću błudźachu. Wšo tole nawodnistwo runje tak přichwatanych pomocnikow tež dušinje chětro poćežowaše. Na kóncu mějachu samo „smjertne wopory“ na starosći.

Při zwučowanju dalše jednotki wohnjowych wobornikow z juha Braniborskeje na pomoc wołachu. Tež helikopter bě zasadźeny. Techniski pomocny skutk a nuzowi dušepastyrjo běchu runje tak aktiwni kaž wšelake wurjadne jednotki katastrofoweho škita, mjez nimi tajke, kiž ludźi z powětra zastaruja. Towaršnosć za wuchowanje žiwjenja na jězoru za „zhubjenymi“ pytaše.