Jedyn z najswojoraznišich indianskich ludow na teritoriju USA je bjezdwěla splah Cherokee (serbsce bychmy tež Čeroki pisać móhli).

Prěnjotna domizna Cherokeejow leži w šěršej wokolinje horin Appalachow w Sewjernej Americe – wosebje na teritoriju dźensnišich statow Južna Carolina, Sewjerna Carolina, Georgia, Tennessee a Kentucky. Po lěće 1800 spytachu so woni „ciwilizowanemu“ wašnju žiwjenja běłych sydlerjow připodobnić. Jónkrótne běše tež to, zo započachu w swójskej rěči pisać. Při tym nasta originalne, na złóžkach bazěrowace pismo. Z jeho wunamakarjom sta so w 20tych lětach 19. lětstotka mysler Sequoyah.

Próca wo přiwzaće „ciwilizacije“ pak Cherokeejam ničo njepomhaše. W lětach 1830 do 1835 jich z domizny namócnje wućěrichu. Dyrbjachu so hač na 2 000 kilometrow dołhi napinacy puć do zapadneho indianskeho teritorija (Oklahoma) nastajić. Něhdźe štwórćina z cyłkownje 16 500 Cherokeejow při tym žiwjenje přisadźi. Tónle eksodus so hač do dźensnišeho jako „Trail of Tears“ (Puć sylzow) wobhladuje.