Praha (SN/LuNo). Předsydstwo Towarstwa přećelow Serbow (SPL) je so zawčerawšim inoficialnje w senaće z wiceprezidentom a z čłonami krajanskeho wuběrka hornjeje komory čěskeho parlamenta zetkało. Přičina zeńdźenja bě, zo chcychu so wo jutrownym wopyće senatorow w Serbach dorěčeć. Wiceprezident senata Ladislav Václavec (njewotwisny za ANO) rjekny: „Kóžde lěto wopytujemy čěskich krajanow w swěće, zo bychmy zwěsćili, kak so komu hdźe wjedźe a kak móhli jich podpěrać. Lětsa na přikład do Brazilskeje polećimy. Ale to njeby dosahało, tohodla smy přemyslowali, koho móhli hišće wopytać. Dokelž su Serbja čěskim krajanam bliscy, přemyslujemy sej k nim dojěć. Lětsa je idealny čas za tajki wopyt.“