Kulow (AK/SN). Cyle wědomje nadběhuja njepřećeljo demokratije institucije a spytaja je wosłabić, překisać a zničić. Fachowcy rěča wo „strategiji přiswojenja“, podšmórny Tom Thieme, profesor za towaršno-politiske kubłanje na Wysokej šuli ­sakskeje policije, kotryž hižo dlěje hač 20 lět na polu ekstremizma slědźi. W Ku­lowskej Křižnej cyrkwi je wón tydźenja wo temje „Zjawna słužba w fokusu“ přednošował.

„Wo něhdźe 400 konkretnych padach prawicarskeho podrywanja pola policije, Zwjazkoweje wobory abo wustawoškita tuchwilu wěmy“, referent rjekny. Něhdźe wosom procentow ludnosće w Němskej ma kruty prawicarskoekstremny swětonahlad, wón znazorni a doda: „Wuchadźejo wot tuteje ličby by to něhdźe 15 000 wojakow a 29 000 čłonow policije potrjechiło.“

Strona AfD ma swójsku strategiju, z kotrejž dźěło demokratiskich institucijow systematisce haći. Wona zasypuje parlamenty z naprašowanjemi a sudnistwa ze skóržbami. „To je terorizm z papjeru ze zaměrom, procesy blokować a ludźi zatrašeć“, Thieme wujasni.