Berlin (dpa/SN). Po dalšim njewuspěšnym zetkanju Armina Lascheta a Markusa Södera minjenu nóc čakachu dźensa wšitcy wobdźěleni na wukónc ćahańcy wo kanclersku kandidaturu unije. Předsydaj CDU a CSU běštaj so wčera w twarjenju zwjazkoweho sejma w Berlinje zetkałoj a dlěje hač tři hodźiny wuradźowałoj, powěsćernja dla rozprawja. Wo wobsahach rozmołwy nižo znate njeje.
Zetkanje bě dotalny wjeršk zwady unije, kotraž so minjeny tydźeń dale a bóle přiwótřeše. Njedyrbjałoj-li so Laschet a Söder tež dźensa dojednać, dyrbjała to frakciji CDU/ CSU zwjazkoweho sejma rozrisać. Bjezposrědnje do wčerawšeho zetkanja Södera a Lascheta je so Młoda unija (JU) z wjetšinu za Söderom stupiła a tak ćišć na Lascheta dale zesylniła. „Wobaj kandidataj měještaj dosć chwile, rozrisanje namakać. To njeje so stało. Nětko čujemy so nuzowani poziciju zabrać. Smy z wulkej wjetšinu za Markusa Södera“, rjekny předsyda JU Tilman Kuban. Na konferency krajnych šefow JU bě so 14 z 18 předsydow za Södera wuprajiło.
Budyšin (SN). Zwjazkowy sejm je na swojim posedźenju minjeny štwórtk „Dojednanje čo. 169 Mjezynarodneje dźěłoweje organizacije (27. junija 1989) wo indigenych ludach“ ratifikował. Domowina kaž tež Serbski sejm to wuraznje witatej.
Předsyda Domowiny w swojim stejišću pisa: „Kaž wobzamknjeny dokument jasnje formuluje, ma so dotalne wusměrjenje něhdyšich mjezynarodnych normow zběhnyć, měrjace so na asimilaciju domoródnych ludow. Smy so tuž jako třěšny zwjazk serbskeho ludu, kotryž je w Federalistiskej uniji europskich narodnych mjeńšin tež mjezynarodnje zakótwjeny, stajnje za to zasadźeli, zo smědźa wšitke ludy po cyłym swěće swoju rěč a kulturu bjez wobmjezowanja pěstować. To je nam, kaž hižo při podpěrje europskeje ludoweje iniciatiwy Minority Safepack, prašenje solidarity.“
Projekt wjesnych kokošow so w porynsko-pfalcskim Bleckhausenje jako wulki wuspěch wopokazuje. Kurjenc z wonkownym arealom je mjeztym zetkawanišćo ludźi a komunikaciski centrum. Zastaranje skotu organizuja w „kokošacych skupinach“. Nimo toho maja městno za sedźenje a přihladowanje. Wjesnjanosta Markus Göbel ma projekt za „absolutne dobyće“. Ideju za wjesne kokoše měješe porik, kotryž bě z Essena na wjes přićahnył. Płoninu je gmejna přewostajiła.
Z kolonu bydlenskich mobilow su sej přiwisnicy campinga sobotu w Berlinje wotewrjenje stanowanišćow žadali. Iniciatiwa „camping z wotstawkom“ zliči wjace hač tysac wobdźělnikow. Wona pokazuje z peticiju na to, zo je camping najwěsćiša a na kontakty najsłabša forma wočerstwjenja za swójby. 44 000 podpismow su zezběrali.
Berlin (SN/JaW). Posrědkować wědu wo narodnych mjeńšinach na šulach po cyłej zwjazkowej republice bě jedna z ćežišćowych temow wčerawšeho internetneho wuradźowanja Mjeńšinoweje rady Němskeje. Wo tym informuje dźensa Berlinski mjeńšinowy sekretariat w nowinskej zdźělence.
Rada štyrjoch narodnych mjeńšin Němskeje „postup diskusije nastupajo rozmołwu a rozmyslowanje wo tym, wědu wo awtochtonych narodnych mjeńšinach na němskich powšitkownych šulach sylnišo šěrić, jasnje wita“, rěka w zdźělence. To bě sej třěšny zwjazk serbskich towarstwow Domowina na internetnej „implementěrowanskej konferency“ zwjazkoweho ministerstwa za nutřkowne naležnosće (BMI) spočatk tydźenja w mjenje Serbow žadał.
Paris (dpa/SN). Zwjazkowa kanclerka Angela Merkel (CDU) je so dźensa na rozmołwach wo konflikće na wuchodźe Ukrainy wobdźěliła. Zhromadnje z francoskim prezidentom Emmanuelom Macronom a ukrainskim prezidentom Wolodimirom Zelenskim wuradźowaše wona wo móžnosćach, konflikt na měrniwe wašnje rozrisać. Francoska chce přiměr zachować a so wo politiske rozrisanje prócować. Tuchwilu napjatosće přiběraja.
Ruscy diplomaća wupokazani
Waršawa (dpa/SN). Pólska je třoch ruskich diplomatow wupokazała. Ruskemu wulkopósłancej w kraju přepodachu wotpowědny dokument, kotryž diplomatam připowědźa, zo njejsu w Pólskej dlěje witani. Sobudźěłaćerjo wulkopósłanstwa su płaćiwe wuměnjenja za diplomatow ranili a Pólskej škodźeli, kaž tamniše wonkowne ministerstwo zdźěli. Waršawa wumjetuje Ruskej w tym zwisku „njepřećelne postupowanje“.
Prěni płun wot kónca lěća