Kritizuja ćahańcu w uniji
Berlin (dpa/SN). W zwadźe wo kanclerskeho kandidata CDU/CSU zhladuja wšitcy na zhromadnu frakciju zwjazkoweho sejma. Dźensa popołdnju chcychu so jeje čłonojo prawidłownje schadźować. Hač tam hižo rozsudźa, njebě spočatnje jasne. Wčera běštej so předsydstwo a prezidij CDU jednohłósnje za Armina Lascheta (CDU) jako kanclerskeho kandidata unije wuprajiłoj. Něšto pozdźišo zasadźowaše so prezidij CSU runje tak jednohłósnje za Markusa Södera. Prašenje chcedźa nětko mjez CDU a CSU „wzajomnje“ rozrisać.
Ćahańca wo kanclerskeho kandidata unije zbudźa tež kritiku. Generalny sekretar SPD Lars Klingbeil mjenowaše ju „egoistisku“. Laschet a Söder měłoj so radšo bojej přećiwo koronapandemiji wěnować. Předsyda frakcije Lěwicy w zwjazkowym sejmje Dietmar Bartsch ma „dźiwadło“ wokoło personalneje politiki za „njedostojne“. Předsyda Zelenych Robert Habeck je sej wěsty, zo trjeba Němska sylnu konserwatiwnu stronu, kotraž njesměła so w rozestajenjach potepić.
Wjace prawa Zwjazkej korony dla
Berlin (dpa/SN). Wuradźowanja wo cyłoněmske jednotne wobmjezowanja w boju přećiwo koronawirusej so po nócnych rozmołwach nachileja: Zwjazkowe knježerstwo je dźensa dopołdnja změnu zakonja wo škiće před infekcijemi wobzamknyło. Naprawy maja płaćić, je-li incidenca we wokrjesach abo bjezwokrjesnych městach tři dny za sobu hódnotu sto překročiła, potajkim je-li ličba nowych infekcijow na 100 000 wobydlerjow wjetša hač sto. Nimo toho ma zakoń knježerstwu prawo dać, z wukazami postajeć. Tak je mjez druhim předwidźane ludźom zakazać, w času mjez 21 a 5 hodź. bydlenje wopušćić. Wobzamknyli dale su, zawodam přikazać, zo maja so přistajeni na wirus testować. Zakoń chcedźa nětko w pospěšenym procesu w zwjazkowym sejmje a Zwjazkowej radźe schwalić, kaž powěsćernja dpa rozprawja.
Sakske knježerstwo chcyše w běhu dnja wuradźować, hač wobmjezowanja koronawirusa dla podlěši. Tak to pječa hač do 9. meje planuja. Potom chcedźa znowa rozsudźić.
Zhromadnje přećiwo skórnikej
Minister radźi wobsedźerjam lěsow k zawodnym zjednoćenstwam
Drježdźany (SN). Ručež je w Sakskej zaso ćoplišo a nalětnje dny dale a dlěše, wotućeja skórniki a dalše škódne insekty ze swojeho zymskeho měra, zo bychu za nowymi štomami pytali, hdźež móhli so rozmnožić. Na to skedźbnja sakski lěsnistwowy zawod w nowinskej zdźělence. Za wobsedźerjow lěsow a lěsnych dźěłaćerjow woznamjenja to wjele dźěła a kedźbliwe postupowanje: Wohrožene štomy dyrbja woni nětko dokładnje kontrolować, hač su wot škódnikow hižo potrjechene. Štomy dyrbja potom pušćić a z lěsow zrumować, prjedy hač je nowa generacija brukow wopušći. „Wobsedźerjo lěsow w Sakskej su minjene lěta z wulkej prócu na wuwiće skórnika reagowali“, wuzběhnje minister za lěsnistwo Wolfram Günther (Zeleni) angažement wobsedźerjow. Zdobom minister připowědźa: „Tež lětsa chcemy swoje prócowanja na to wusměrić, škody w lěsach wobmjezować. Nadawk wostanje naročny.“ Zdobom chcedźa škody intensiwnje registrować.
To a tamne (13.04.21)
Změna wjedra město wohenja: Ćahata kurjawa a ćmowe mróčele su w Allgäuskich Alpach wjetše zasadźenje wohnjowych wobornikow zawinowali. Muž bě w nocy na póndźelu na horje pola Pfrontena přirodny zjaw wobkedźbował a sej myslił, zo so hórska chata pali. Wjacore jednotki wohnjoweje wobory a policisća na to kónčinu přepytali, bjez toho zo bychu woheń wuhladali. Tak bě prosće wjedrowy zjaw muža zamylił.
Najwjetšeho nukla swěta su wobsedźerce we Wulkej Britaniskej pokradnyli. Darius je po Guinnessowej knize rekordow 129 centimetrow dołhi a wot lěta 2010 nošer titula. Wobsedźerka Annette Edwards paducha prosy, nukla zaso wróćić a přilubja jemu wjace hač tysac eurow. „Darius je za plahowanje mjeztym přestary“, wona zrudna twitterowaše.
Žada sej kónc wójnow
Vatikan (B/SN). W swojim tradicionalnym jutrownym poselstwje žadaše sej bamž Franciskus energisce bórzomne zakónčenje wójnow na swěće a sprawne rozdźělenje šćěpiwow. Wosebje apelowaše wón, njezabyć na chudych a bědnych. Korony dla njepřednjese wón jutrowne poselstwo po zwučenym wašnju z wokna k Pětrowemu naměstu, ale přečita je po kemšach we Vatikanskej bazilice, hdźež wobdźěli so jenož něhdźe 200 kemšerjow. „Zrowastanjenje Jězusa by móhło wosrjedź tutych napjatosćow budźić nowu nadźiju,“ rjekny bamž. 170 telewizijnych sćelakow wusyłaše bamžowske žohnowanje „Urbi et orbi“. Hižo w jutrownej nocy bě pontifeks pozbudźował: „Z Božej pomocu móže so z črjopjenca čłowječich stawiznow stać wuměłstwo.“
Lětsa do Francoskeje
Zastupnika wola po podpisanju noweho zrěčenja
Budyšin (SN/JaW). Domowina chce so wo zakonsce płaćiwy namjet zastupnika abo zastupniče Serbow w rozhłosowej radźe MDR starać. To podšmórny předsyda Domowiny Dawid Statnik w nowinskej zdźělence. Zdobom wón potwjerdźi, zo ma Domowina jako třěšny zwjazk serbskich towarstwow „demokratisce legitimowany nadawk, zastupjerja abo zastupjerku Serbow za rozhłosowu radu MDR wolić“.
Ampla nětko žołta
Saarbrücken (dpa/SN). W Posaarskej je sydomdnjowska incidenca hižo tři dny za sobu hódnotu sto překročiła. Tuž je tak mjenowana koronowa ampla wot zeleneje na žołtu barbu přešaltowała. Wot dźensnišeho płaći rozšěrjena winowatosć testowanja nětko tež we wobchodach a ćěłu bliske posłužby nastupajo, kaž strowotniske ministerstwo informuje. W Posaarskej běchu minjenu wutoru wonkownu gastronomiju, dźiwadła, kina a fitnesowe studija zaso wotewrěli.
Nuzowy staw skónčeny
Praha (dpa/SN). W Čěskej su minjenu nóc hižo poł lěta płaćiwy nuzowy staw skónčili. Tak je zakaz, region wopušćić, runje tak zběhnjeny kaž zakaz, w nocy dom wopušćić. Přiwšěm su hosćency a wobchody dale zawrjene. Nimo toho dyrbja ludźo w zjawnosći dale nahubnik wužiwać. Po wšěm kraju płaćiwy nuzowy staw běchu loni 5. oktobra wukazali a wospjet podlěšili. Ličba nowych infekcijow na 100 000 wobydlerjow wučinja 808 a je trójce tak wulka kaž w Němskej.
Heil chce winowatosć testow
Zwjazkowy prezident Frank-Walter Steinmeier (srjedźa) je wčera ...
Laschet abo Söder – unija dyrbi rozsudźić
Berlin (dpa/SN). Z wotewrjenym bojom wo móc nastupajo kanclersku kandidaturu mjez předsydu CDU Arminom Laschetom a předsydu CSU Markusom Söderom steji unija dźensa pod wulkim ćišćom. Armin Laschet chcyše sej dopołdnja na zhromadnym posedźenju předsydstwa a prezidija CDU podpěru nawodnistwa strony zaručić a „wo dowěru prosyć“, kaž wón wčera wječor w telewiziji ARD rjekny. Na prašenje, hač z podpěru wjetšiny liči, Laschet zwurazni: „Z toho wuchadźam.“
Tež prezidiji CSU chcyše so dźensa popołdnju schadźować. Hromadźe z Laschetom wustupujo Markus Söder wčera potwjerdźi, zo chcył jenož potom jako kancler kandidować, by-li wulku podpěru nawodnistwa CDU měł. Bayerski ministerski prezident přilubi, zo by so tež w tamnym padźe bjez hněwa zarjadował a dowěrliwje z Laschetom hromadźe dźěłał.
