Podstupim (dpa/SN). Po wotzamknjenju koaliciskeho zrěčenja tak mjenowaneje keniaskeje koalicije mjez SPD, CDU a Zelenymi w Braniborskej dyrbja nětko po­trjechene strony přihłosować. To ma so přichodne tydźenje stać. CDU a Zeleni chcedźa so swojich čłonow woprašeć, hač zrěčenju přihłosuja. SPD planuje 16. nowembra wurjadny stronski zjězd. Štyri dny pozdźišo, 20. nowembra, chcedźa ministerskeho prezidenta Dietmara Woidkeho (SPD) znowa do zastojnstwa wuzwolić.

Amtěrowacy financny minister Bra­niborskeje Christian Görke (Lěwica) wujednane koaliciske zrěčenje kritizuje: „W nim su wšěm wšitko přilubili“, rjekny wón w inforadiju RBB. „Nětko chcedźa tutón zwjazk z pjenjezami hromadźe dźeržeć“, wón šwika. Görke stronam wumjetuje, zo chcedźa cyłu miliardu eurow kredita brać. Wón je sej wěsty, zo su wšitke wažne projekty tež bjez kredita za­płaćomne. Wšako ma kraj nalutowanki dweju­ miliardow eurow.

Berlin (dpa/SN). W mjezynarodnym přirunanju wobswědčeja němskim pěstowarnjam a žłobikam wosebje wysoku facho­wu kompetencu. To wujewja pře­pytowanje Organizacije za hospodarske zhromadne dźěło a wuwiće (OECD), kotrež su minjeny pjatk w Berlinje předstajili. Po tym je 97 procentow pěstowarkow a 95 procentow žłobikarkow za dźěło z dźěćimi wosebje wukubłanych. To je najwjetši podźěl přirunujo z druhimi přepytowanymi krajemi. OECD bě so 18 000 nawodow a fachowcow w Chile, Danskej, Němskej, Islandskej, Israelu, Japanskej, Južnej Koreji, Norwegskej a Turkowskej woprašała. To běchu kraje, kotrež su na tajkim přepytowanju zajimowane byli. Naprašniki běchu tak zdźěłane, zo běchu wuslědki najebać kulturne rozdźěle přirunajomne, OECD zdźěla.

Přemóžaca wjetšina kubłarkow a kubłarjow w Němskej je ze swojim powo­łanjom spokojom (93 proc.). Nastupajo připóznaće w towaršnosći a wotpowědne płaćenje widźa so w Němskej porno druhim krajam skerje na niskej runinje.

Po wólbach Erfurtskeho krajneho sejma liča z wobćežnymi jednanjemi

Erfurt (dpa/SN). Bodo Ramelow je wusahowacy dobyćer wčerawšich wólbow Durinskeho krajneho sejma: Lěwica ministerskeho prezidenta sta so wčera prěni króć scyła w jednym ze zwjazkowych krajow Němskeje z najsylnišej politiskej mocu, štož je wobkedźbowarjam runjewon historiski podawk. Přiwšěm je dotalna koalicija Lěwicy a SPD wotwolena. CDU, kotraž bě wot lěta 1990 při kóždych wólbach najsylniša politiska móc, je runje tak historisce swój najšpatniši wuslědk žnjała. Wona přińdźe na třeće městno za AfD, kiž móžeše swój wuslědk podwojić. Jednanja wo nowu koaliciju drje budu wobćežne.

Berlin (dpa/SN). Zwjazkowy prezident Frank-Walter Steinmeier je so za bjezkopromisnje sprawne a respektne rozestajenje w towaršnosći wuprajił. „Štož zawěsće njetrjebamy – a dajće mi to aktualneje přičiny dla jasnje rjec – su agresiwne haćenja rozmołwow, zatrašenja a nadpady“, rjekny Steinmeier minjeny pjatk w Berlinje. „Měnju nadpady na pozdatnje njepři­jomnych politikarjow, kaž je so to w Göttingenje a Hamburgu stało, abo na dwělomnych profesorow w uniwersitnych žur­lach“, wón doda. Nichtó njetrjeba mjelčeć, hdyž so jemu něšto njelubi. „Tola druhim słowo zakazać chcyć, dokelž swójskemu wobrazej wo swěće njewotpowěduja, njeje akceptabelne“, Steinmeier podšmórny. Minjeny tydźeń běchu sta demonstrantow přednošk sobuzałožerja AfD Bernda Luckeho, kiž bě so jako profesor za hospodarstwo na Hamburgsku uniwersitu wróćił, masiwnje mylili. Póndźelu běchu lěwicarscy aktiwisća na Göttingenskej literarnej nazymje čitanju bywšeho nutřkowneho ministra Thomasa de Maizièra (CDU) zadźěwali. Steinmeier: „K demokratiji słuša na rozestajenjach so wobdźělić, ale jim njezadźěwać.“