Naćisk koalicije dotal w sakskim krajnym sejmje dosć přiwisnikow nima

Drježdźany (SN/mb). Po dźesać lětach je so sakski krajny sejm zašły tydźeń prěni raz zaso ze změnu wustawy swobodneho stata zaběrał. Tehdom su CDU, SPD, FDP, Zeleni a połojca frakcije Lěwicy zakaz zadołženja zawjedli. Jenož za čas přirodnych katastrofow abo hospodarskich wušparanjow su wuwzaća móžne. Nětko su frakcije aktualneje koalicije CDU, SPD a Zelenych naćisk za změnu krajneje wustawy zapodali (Serbske Nowiny rozprawjachu), kotrež wosebje zesylnjenju direktneje demokratije słuži.

Diskusije w Pirnje po dobyću kandidata AfD při wólbach wyšeho měšćanosty dawaja mały dočasny zaćišć na to, štož nas klětu w Sakskej wočakuje: Štó je poprawom wina na dobyću strony, z kotrejž nochce nichtó ničo činić měć? By snadź lěpje było, by-li zastupniča CDU swoju kandidaturu cofnyła abo tola snadź kandidat swobodnych wolerjow? Sakska CDU wšak so po njedawnym woprašowanju wolerjow zaso nadźija, zo so z 33 procentami sama přećiwo AfD předrěje a zo pomoc tamnych stron na kóncu scyła njetrjeba. Hač k wólbach klětu nazymu pak je hišće trochu časa. Snano by wunošne było, dotalne wólbnobojowe srědki na jich skutkownosć pruwować. Wočiwidnje njeje posudk wustawoškita, zo je AfD prawicarsko-ekstremistiska, ničo wuskutkował. A hdyž nastupja strony z hesłom „Přećiwo hidźe, šćuwańcy a wumjezowanju“ přećiwo AfD, dyrbja so prašeć dać, hač so z „palnymi murjemi“ sami na wumjezowanju njewobdźěla. Marko Wjeńka

Derje do Chiny dolećałoj staj pandamjedwjedźej Pit a Paule z Berlinskeje coologiskeje zahrody. Po wjace hač dźesać hodźinach stej wobaj nětko w Chengdu w tamnišej staciji za plahowanje pandamjedwjedźow a jich přeslědźenje. Staršej wobeju wostanjetaj w Berlinje. Přećah lěta 2019 rodźeneju dwójnikow bě hižo dlěši čas planowane. Pandemija bě tomu dotal zadźěwała. Mjedwjedźej stej kaž jeju staršej swójstwo Chinskeje republiki.

Na awtodróhowym wotpočnišću zabyli su 73lětnu wčera, njedźelu. Žona bě so minjenu nóc na parkowanišću při A 96 w Bayerskej na nuznik podała. Jako so nawróći, bě awto preč. 67lětny bratr bě na jězbje z Bosniskeje do Šwicarskeje pozastał a njebě pytnył, zo je tež žona wulězła. Tole widźo, so hnydom zawróći. Sobudźěłaćer tankownje bě hižo policiju wołał, „rozpjeršeneje žony bjez kabata“ dla.

Tel Aviv/Gaza (dpa/SN). Israelske wójsko je po swójskich informacijach dalše ćěła z Israela do Gazaskeho pasma zawlečenych zastajencow namakało. Smjertne powostanki 28lětneho a dweju wojakow su do Israela dowjezli a tam identifikowali. Mužow běchu islamisća 7. oktobra při nadpadźe na Israel zawlekli. Morjenaj wojakaj staj 19 lět staraj młodostnaj. Jeju swójby su mjeztym informowali. 28lětny mortwy muž je pječa francoski staćan.

Dalše sankcije přećiwo Ruskej

Brüssel (dpa/SN). Čłonske staty EU su so na nowy paket sankcijow přećiwo Ruskej dorozumili. Tole je rěčnica prezidenta Rady EU Charlesa Michela na kromje wjerškoweho zetkanja w Brüsselu zdźěliła. Tak chcedźa krajam zakazać, z ruskimi diamantami wikować a dotal lědma skutkowne wobmjezowanje płaćiznow ruskeho wolija na mjezynarodnych wikach přiwótřić. Planuja tež naprawy přećiwo wosobam a organizacijam, kotřiž wójnu Ruskeje přećiwo Ukrainje witaja.

Wobzamkny dodatny etat