Swoju rólu maja hakle postajić
Wo słabosćach a móžnosćach za skutkowanje powołaneje rady starostow
Chceš-li Serbski sejm jako demokratisce legitimowany gremij docpěć, je wotpowědne statne zrěčenje Sakskeje a Braniborskeje njewobeńdźomne. Poprawny juristiski zakład za wólby cyłoserbskeho zastupnistwa pak hišće pobrachuje. Kelko wody Sprjewje hač do toho wokomika hišće z Łužicy do Berlina poběži, tuchwilu nichtó njewě. Njedyrbjeli tohodla prócowanja wo takrjec rewolucionarno-bazowodemokratiske sebjezałoženje sejma a jeho organow – tež rady starostow – prawnisce bjez kóždehožkuli wuznama a tuž jenož moraliski narok wostać?
Wótri kritikarjo, ale tež podpěraćeljo ideje serbskeho parlamenta su sej přezjedni, zo zakładne předwuměnjenje spjelnjene njeje. Najebać to buchu kónc januara we Wojerecach čłonojo a čłonki rady starostow powołani. Iniciatiwa Serbski sejm bě so rozsudźiła, tajku radu do žiwjenja zwołać. Njepředležace statne zrěčenje maja skerje za přidatny pohon hač za haćidło. Měnja, zo šěsćlětne prócowanja na tymle polu sej za serbsku zjawnosć widźomny wuslědk žadaja.
Plista Trumpej
Washington (dpa/K/SN). Prezident USA Donald Trump je za swoje werbalne hanjenja zwjazkowych sudnikow dóstał plistu z powołaneho erta. Trumpowy wosobinski kandidat za supreme court, najwyše sudnistwo USA, Neil Gorsuch je jeho złe wurazy mjenował „demoralizo- wace a demotiwowace“ za njewotwisnosć zwjazkowych sudnistwow. Tole rozprawjeja wjacore ameriske medije, powołace so na demokratiskeho senatora Richarda Blumenthala.
Za zhromadne napinanje
Berlin (dpa/SN). Zwjazkowy nutřkowny minister Thomas de Maizière (CDU) žada sej wjace zamołwitosće a konsekwency při wotsunjenju migrantow z Němskeje. Tam-a-sem-suwanje zamołwitosće mjez Zwjazkom a zwjazkowymi krajemi dyrbjało přestać, rjekny wón dźensa rano w telewiziji ARD. „Dyrbimy so zhromadnje napinać.“ Tež Zwjazk ma wjace zamołwitosće přewzać. Wječor chcychu zastupnicy Zwjazka a krajow wo 16dypkowym planje za spěšniše wotsunjenje migrantow wuradźować.
Schulz přećiwo renće ze 70
Z wosebitymi T-shirtami a plakatami je wčera něhdźe 20 ...
Šef awtokoncerna VW pola Putina był
May nětko społnomócnjena
Wopytowarjo to zhonili, štož su słyšeć chcyli
Budyšin (SN/MkWj). Něhdźe 150 ludźi je wčera wječor přeprošenje Budyskeje AfD na zarjadowanje strony sćěhowało. Žurla Budyskeho hotela Residence bě wobsadźena. Hłowny podawk bě přednošk na temu „Ekstremizm w Sakskej – pozicije frakcije AfD w krajnym sejmje“. Za to běchu sej wjelelětneho telewizijneho žurnalista Hansa-Hermanna Gockela přeprosyli. Wón je na tule temu knihu napisał a přednošowaše wo strachach, kotrež ludźom ze złahodnjenjom lěwicarskeho ekstremizma, nabožneho fanatizma kaž tež prawicarskeho ekstremizma hroža. Přitomnaj běštaj tež zapósłancaj AfD w sakskim sejmje. Policija bě masiwnje prezentna. Wona tomu zadźěwa, zo so přećiwni demonstranća hač k hotelej předrěja.
To a tamne (09.02.17)
Podarmo je 32lětny při Bodamskim jězoru spytał, wóń marihuany ze smjerdźatym twarožkom zakryć. Policisća běchu chětro połny nachribjetnik muža na Lindauskim dwórnišću kontrolowali. We wačoku namakachu wšelake žiwidła a wjacore tyzy ze sylnje wonjacym twarožkom. Tam pak běchu drogi schowane. Zastojnicy marihuanu sćazachu, wupisachu skóržbu a pósłachu muža z twarožkom skónčnje dale.
Mjerzajo so na snědań, kotruž bě mać jemu do pěstowarnje sobu dała, je pjećlětny w Stuttgarće ćeknył a z měšćanskej železnicu wotjěł. Po puću do pěstowarnje bě so z maćerju tak zwadźił, zo jej twochny a na zastanišću do železnicy zalěze. Sobujěduca žona pjeracha narěča a přepoda jeho policiji, kotruž bě mać hižo zazwoniła. Tola tež jako hólc mać zaso widźeše, bě přeco hišće hněwny.
Postupy SPD wobkrućene
Berlin (dpa/K/SN). Zo SPD z Martinom Schulzom jako kandidatom na kanclera postupuje, wobkruća tež woprašowanje agentury Forsa za sćelak RTL a časopis Stern. Te je wunjesło, zo je SPD w běhu tydźenja pjeć dypkow přibyła a tak na 31 procentow postupiła. Jeje zastatk na uniju wučinja nětko jenož hišće tři procenty, je dźě Forsa za CDU/CSU 34 procentow zwěsćiła. We woprašowanju agentury Insa za nowinu Bild su socialdemokraća uniju samo hižo přesćahnyli.
Abbas šwika israelski zakoń
Paris (dpa/K/SN). Prezident Palestinjanow Mahmud Abbas je israelski sydlerski zakoń jako „agresiju přećiwo našemu ludej“ raznje pošwikał. „Tónle zakoń rani mjezynarodne prawo“, zwurazni Abbas wčera w Parisu składnostnje swojeho zetkanja z francoskim prezidentom Françoisom Hollandeom. Tón je zakoń kritizował, dokelž móhł być „puć k faktiskej aneksiji wobsadźeneho palestinskeho teritorija“.
Razniše chłostanja schwalili
Lěty wupadnyli
Tilich na wopyće w čěskej stolicy
Praha (dpa/K/SN). Po dotwarje awtodróhi Drježdźany–Praha zaměrjatej so Čěska a Sakska na železniski zwisk wysokeje spěšnosće. Njesmě być, zo nakładne awta awtodróhu zatykaja, praji sakski ministerski prezident Stanisław Tilich (CDU) wčera na wopyće w Praze. Zwjazkowy minister za wobchad Alexander Dobrindt (CDU) je jemu připrajił, hišće lětsa hospodarsku wužitnosć wysokospěšneje čary Drježdźany–Praha dać přepruwować. Tilich a čěski ministerski prezident Bohuslav Sobotka mataj zahajenje twara tajkeje čary w lěće 2035 za móžne. Dotal jězdźa wšitke ćahi přez idylisku dolinu Łobja a Čěsko-Saksku Šwicu.
Dalša tema zetkanja Tilicha a Sobotki bě kriminalita w pohraničnych kónčinach a zaměrny bój přećiwo njej. „W tym nastupanju je widźomnych postupow“, sakski premier zwurazni. Na přikład njekradnu hižo telko awtow. Dźensa je Tilich w sewjernych Čechach wotnožki wjacorych sakskich firmow wopytał.
