Paris (dpa/K/SN). Kandidat francoskich konserwatiwnych na prezidentstwo budźe klětu něhdyši ministerski prezident François Fillon (62). Jeho přećiwnik we wčerawšich stronskich wurisanskich wólbach, ekspremier Alain Juppé (71), je poražku přiznał a dobyćerjej wjele zboža wupřał. Za Fillona wupraji so něhdźe 67 procentow. Prawdźepodobnje změje so wón nalěto z prawicarskej ekstremistku Marinu Le Pen wo prezidentstwo měrić. Swoju stronu namołwi Fillon k jednoće a přilubi, „zakitować francoske hódnoty“. Zwjazkarstwo z USA ma wón dale za wažne, trěbne pak je za njeho tež zhromadne dźěło z Ruskej. Mnozy maja Fillona za dobreho přećela Putina.

Nadźiju na bórzomne posedźenje rady NATO a Ruskeje spušćili

Brüssel (dpa/SN). Planowanja za nowe rozmołwy mjez NATO a Ruskej su dale wobćežne. Po informacijach powěsćernje dpa su zastupnicy wojerskeje aliancy nadźiju spušćili, hišće do zetkanja wonkownych ministrow NATO přichodny tydźeń posedźenje tak mjenowaneje rady NATO a Ruskeje organizować móc. Tam chcychu poprawom spytać, konflikta na wuchodźe Ukrainy dla přetorhnjenu komunikaciju z Moskwu zaso trochu polěpšić.

Hłowna přičina dotal njewuspěšnych planow su po informacijach wojerskeho zwjazka rozdźělne předstawy wo tym, kak měli so rozmołwy wotměć. NATO bě namjetowała­, w rozmołwnych kołach z krutym dnjowym porjadom dźěłać. Porno tomu sej Ruska žada, na zetkanju wulkopósłancow z wulkim spek­trumom temow fleksibelnje wobchadźeć.

Berlin (dpa/SN). Zwjazkowy justicny minister Heiko Maas chcył w boju přećiwo ekstremistam brónjenske prawo přiwótřić. Předstajomne je po jeho słowach prawidłowne naprašowanje pola wustawoškita, prjedy hač někomu brónjowy wupokaz wupisaja, rjekny politikar SPD wčera wječor w telewiziji ARD. Wón warnowaše w tym zwisku před přiběracej zwólniwosću tak mjenowanych „reichs­bürgerow“. Namócny potencial tohole hibanja spochi přiběra, Maas zwurazni. W oktobru bě tajki reichsbürger w Bayerskej policista zatřělił. Reichsbürgerojo zwjazkowu republiku njepřipóznawaja.

Dwaceći metrow dołhi šawl a čapka pyšitej nětko historisku wěžu južnobraniborskeho Łukowa (Luckau). Dźesatki dobrowólnikow su za to minjene měsacy pilnje pletli a wjace hač sto dźělow znosyli, kaž Łukowske přemysłowe towarstwo zdźěla. Hač do 3. adwenta ma wěža swoju „zymsku drastu“ wobchować. Wona je dźěl historiskeho měšćanskeho wobhrodźenja a zdobom symbol města. Wobydlerjo sej stajnje zaso swojorazne akcije wokoło njeje wumysleja.

Přichodna zyma budźe kruta. Tole je wuslědk tradicionalneho waženja kóčki w małym rudnohorinskim Voigtsdorfje. Kocor Nero wažeše wčera 6 470 gramow. To je 40 procentow wjace hač w lěću. Normalnje pak tajke skoćo wo 25 procentow wahi přibywa. „Nero je so porjadnje nažrał, to budźe kruta zyma.“ Tole pišu organizatorojo spektakla wotpowědnje hesłu: Čim tołša kóčka, ćim zymnišo budźe. Zarjadowanje, kotrež su w Voigtsdorfje hižo třeći króć organizowali, je wjace hač 300 wopytowarjow přiwabiło.