AfD znowa wólby dobyła
Raguhn-Jeßnitz (dpa/SN). Zepěrajo so na cyłoněmski trend je AfD znowa komunalne wólby we wuchodnej Němskej za sebje rozsudźiła. Kandidat AfD Hannes Loth je wčerawše wólby měšćanosty w městačku Raguhn-Jeßnitz w Saksko-Anhaltskej dobył, tydźeń po tym, zo su w durinskim Sonnebergu prěni króć krajneho radu AfD wuzwolili. Politikarjo Lěwicy a Zelenych reagowachu starosćiwje. AfD ma wólby za „signal, zo je strona wuwiće na wuchodźe Němskeje skrućiła“.
Mjenje pjenjez za dźěći
Berlin (dpa/SN). K financowanju planowaneho zakładneho zawěsćenja dźěći su po słowach zwjazkoweho financneho ministra Christiana Lindnera za lěto 2025 „najprjedy raz“ dwě miliardźe eurow zaplanowali. „Zwjazkowe knježerstwo pak nima hišće žadyn koncept a tak tež žane dokładne trochowanje kóštow“, rjekny politikar FDP nowinarjam. Planowana suma je wo tójšto niša hač dwanaće miliardow eurow, kotrež bě sej swójbna ministerka Lisa Paus (Zeleni) žadała.
Israel nadběhuje Palestinjanow
Macron wočakuje měšćanostow
Paris (dpa/SN). Po dny trajacych njeměrach so zdawa, jako by žołma namocy na dróhach Francoskeje poněčim zaso woćichła. Minjenu nóc je policija po informacijach nutřkowneho ministerstwa 49 ludźi zajała, jasnje mjenje hač dny do toho. W někotrych městach, kaž w Lyonje, je drje zaso k namócnosćam dóšło. Hladajo na razne njeměry minjenych nocow ze sta palacymi so awtami a twarjenjemi a zdźěla wjace hač tysac zajatymi demonstrantami, bě nóc na póndźelu po wšěm kraju poměrnje měrna.
Nutřkowny minister Gérald Darmanin je tež zašłu nóc masiwnu prezencu policije wukazał. Po wšěm kraju bě 45 000 zastojnikow zasadźenych, tež tónkróć zaso z pancerowanymi jězdźidłami. Po informacijach medijow mějachu policisća přikaz, konsekwentnje wustupować a namócnych demonstrantow zajeć. Po smjerći 17lětneho přez kulku policista při wobchadnej kontroli minjenu wutoru je Francoska masiwnu žołmu namocy dožiwiła. Wospjet dóńdźe k wurubjowanju wobchodow, k zapalerstwu a namócnym konfrontacijam mjez policistami a randalěrowacymi.
Fachowcy k tepjenju wuradźowali
Berlin (dpa/SN). Hišće tutón tydźeń chcedźa w zwjazkowym sejmje nowy zakoń nastupajo tepjenja wobzamknyć. Zazběh procesa bě dźensniše słyšenje we wuběrku sejma za klimu a energiju. Słowa jimali su so tam mjez druhim zastupnicy rjemjesła, imobilijoweje branše, zastaranskeho hospodarstwa a škita přetrjebarjow. Wuběrk ma doporučenja zdźěłać, kotrež chcedźa zapósłancam k wothłosowanju předpołožić.
Koaliciscy partnerojo SPD, Zeleni a FDP běchu so měsacy dołho nastupajo změny zakonja wadźili. Dojednali so na to su, zo smědźa přichodnje jenož hišće nowe tepjenja zatwarić, kotrež znajmjeńša 65 procentow swojeje energije z wobnowjomnych žórłow bjeru. Wot 2024 płaći to najprjedy raz za nowotwarske kónčiny. Nimo toho dyrbja komuny wotpowědne planowanje ćopłoty hač do lěta 2028 předpołožić. Předsyda wuběrka Klaus Ernst (Lěwica) kritizowaše, zo je čas přihota za zapósłancow překrótki. Wón šwikaše „pobrachowacu česćownosć“ parlamentej napřećo.
„Połoženje komplikowane“
Dalše ćežke wojowanja na wuchodźe Ukrainy – Pistorius w Pólskej
Kijew/Waršawa (dpa/SN). Zwjazkowy minister za zakitowanje Boris Pistorius (SPD) je dźensa kontingent zwjazkoweje wobory wopytał, kiž posłužuje lětadła a rakety wotwobaracy system Patriot w Zamosću, na juhowuchodźe Pólskeje. Tam wočakowaše jeho pólski kolega w zastojnstwje Mariusz Błaszczak. Po rozmołwje chcyše Pistorius zepěranišćo systema Patriot zwonka města wopytać. Wojacy zwjazkoweje wobory posłužuja njedaloko ukrainskeje mjezy systemaj typa Patriot, zo bychu powětrowy rum Pólskeje škitali.
Žaruja wo maturantku
Berlin (dpa/SN). Po smjertnym njezbožu na maturitnej wotchadničce w Berlinje knježi na potrjechenym Rosy Luxemburgowym gymnaziju „njesměrna zrudoba“. Šula piše dźensa na swojej internetnej stronje: „Gymnazij Rosy Luxemburg žaruje wo swoju maturantku. Dny radosće skónčichu so njejapce. Je to ból, kotraž so njepominje. Naše mysle su pola swójby młodeje žony a pola wšěch maturantow.“ 17lětna maturantka bě minjenu nóc na třěše hotela přez plastowe wokno zapadnyła a so smjertnje zraniła.
Mjeztym je hotel Estrel w Berlinje nadrobnosće njezboža wozjewił. Po tym staj dwaj absolwentaj na třěchu susodneho twarjenja swjedźenskeje žurle zalězłoj a so tam na plastowe wokno třěchi sydnyłoj. Wěko je so pod ćežu wobeju zwjezło, rěčnik hotela zdźěli. Šulerjej padnyštaj něhdźe wosom metrow do hłubiny. Sobušuler młodeje žony padny na sudobjo wotpadkow a so jenož snadnje zrani. 17lětnu maturantku dowjezechu do chorownje, hdźež wona na sćěhi swojich ćežkich zranjenjow wudycha. Sobudźěłaćerjo hotela su hłuboku poraženi, jednaćelstwo domu zdźěla.
To a tamne (03.07.23)
Wjace hač 6 000 zajimcow je mjeztym 22. mjezynarodne zetkanje jězdźidłow wuchodneho bloka w technikowym muzeju w Pütnitzu we wokrjesu Předpomorska-Rujany wopytało. Widźeć bě tam 1 600 jězdźidłow, wot motorskich, přez awta hač k ćežkim nakładnym awtam. Towarstwo techniki eksistuje wot lěta 2001 a chce jězdźidła bywšeho wuchodneho bloka zachować, ponowić a ludźom zbližić. Wot lěta 2004 wužiwaja za to bywše wojerske lětanišćo Pütnitz.
Tykanc chorobneho personala zjědł je wopity muž w klinice w Hornjej Pfalcy. 61lětneho běchu w nocy na njedźelu chětro pjaneho do nuzoweje přijimarnje chorownje w bayerskim Weidenje přiwjezli. Tam dźěše wón do stwy přistajenych a da so do tykanca, kiž bě za nócnu změnu přihotowany. Hač dyrbi muž ze skóržbu ličić, ma statne rěčnistwo pruwować.
Unija z „Agendu za Němsku“
Mnichow (dpa/SN). Wodźacy zastupnicy CDU a CSU chcychu so dźensa z dźewjeć dypkowym programom ludźom jako jasna alternatiwa k amplowemu knježerstwu SPD, Zelenych a FDP prezentować. Dokument z hesłom „Agenda za Němsku“ chcychu do toho na zhromadnym posedźenju prezidijow wobeju stronow w Mnichowje wobzamknyć – dobre štwórć lěta do wažnych wólbow krajneju sejmow w Bayerskej a Hessenskej. W pismje žadaja sej mjez druhim zniženje dawkow.
Kritizuja wyše přinoški
Berlin (dpa/SN). Dźěłarnistwa a dźěłodawarjo su wyše přinoški za hladanske zawěsćenje 1. julija kritizowali. Prezident zwjazka dźěłodawarjow Rainer Dulger rjekny powěsćerni dpa, zo je sej politika ze zwyšenjom přinoškow za sebje najpřijomniši puć wuzwoliła. „Runje w časach inflacije dyrbjała politika wšitko činić, zo njeby ludźi dale poćežowała.“ Čłonka předsydstwa dźěłarniskeho zwjazka DGB Anja Piel rjekny: „Zwyšenje hladanske zawěsćenje njewuchowa.“ Jutře přinoški zawěsćenja wo 0,35 procentow zwyša.
Biden spi wotnětka z masku
