W swětnišćowym centrumje „Hwězdne městačko“ pola Moskwy ...
Lěkarske zastaranje přez mjezu móžne
Drježdźany (SN). Sakska ministerka za strowotnistwo Barbara Klepsch (CDU) a čěski strowotniski minister Adam Vojtěch staj zawčerawšim, srjedu, „Zhromadnu deklaraciju wo zhromadnym dźěle w mjezy přesahowacym strowotniskim zastaranju“ podpisałoj. To je prěnja kročel, zo móhli so čěscy staćenjo přichodnje w Sakskej strowotnisce zastarać dać. Kóšty za to přewozmu čěske chorobne kasy. Stejišćo wobsahuje nimo toho móžnosć, zhromadne dźěło na polu mediciny na wšu pomjeznu kónčinu mjez Čěskej a Sakskej rozšěrić.
Kretschmer a Woidke so polěpšiłoj
Mainz (dpa/SN). Dwaj dnjej do wólbow krajneju sejmow w Sakskej a Braniborskej su wjacore politiske strony wólbny bój ze zakónčacymi zarjadowanjemi wuklinčeć dali. Po najnowšim naprašowanju móžeštaj wobaj ministerskaj prezidentaj swoju poziciju snadnje polěpšić.
Sakska CDU z premierom Michaelom Kretschmerom na čole móže so po studiji politbarometra sćelaka ZDF 32 procentow hłosow nadźijeć. Z procentom wjace hač minjeny tydźeń je Michael Kretschmer swój předskok k AfD dale powjetšił. Prawicarscy populisća maja 24,5 procentow, poł procenta mjenje hač tydźenja.
W Braniborskej je so ministerski prezident Dietmar Woidke (SPD) tohorunja snadnje polěpšił a ma 22 procentow (plus 1). AfD je z 21 procentami (plus 1) nimale runje tak sylna. Wulki wuznam změja hišće njerozsudźeni wolerjo. 33 procentow prašanych hišće njewě, koho maja zajutřišim, njedźelu, wolić.
Jasny křižik pomha při wuličenju
Wólbny dźeń
Njedźelu, 1. septembra, wola wobydlerjo z hłownym bydlenjom w Sakskej nowy krajny sejm na dobu pjeć lět.
Wólbny wokrjes
Teritorij Sakskeje je rozrjadowany do 60 wólbnych wokrjesow. W Budyskim wokrjesu su wólbne wokrjesy 52 (Biskopicy), 53 (Kamjenc), 54 (Radeberg, Kulow), 55 (Wojerecy, Radwor) a 56 (Budyšin, Bukecy, Wóspork); w Zhorjelskim wokrjesu 57 (Běła Woda, Slepo), 58 (Zhorjelc), 59 (Lubij) a 60 (Žitawa).
Wólbny lokal
Hdźe maće wolić, wučitaće z wólbneje zdźělenki, kotruž sće z póštu dóstali. Tam tež napisane steji, zo su wólbne lokale na wólbnym dnju wot 8 do 18 hodź. wotewrjene.
We wólbnym lokalu
W předrumnosći wólbneho lokala su mustrowe hłosowanske lisćiki wupójsnjene, zo byšće so do poprawneho wothłosowanja hišće raz přeswědčić móhli, hdźe stejitej mjenje direktneho kandidata a strony, za kotrejuž chceće hłosować.
Hłosowanski lisćik
To a tamne (30.08.19)
Přepytowanja wobchadneho njezboža, po kotrymž bě zawinowar ćeknył, wjedźechu policiju k 15lětnemu młodostnemu. Tón bě klučiki swójbneho awta wzał, zo by sej z přećelom wulećał. Při wróćostorkanju zrazy wón z tajkim wotmachom do druheho awta, zo zadnja storkawa z čisłowej tafličku wotpadny. 15lětny na to z awtom ćekny a staji je zaso do garaže. Krótko po tym zo běchu zastojnicy wobsedźerja tamneho woza zazwonili, přińdźe tón zhromadnje ze synom k městnu njezboža. Nastata škoda wučinja 6 000 eurow.
Kuriozneho podawka na swětowych mišterstwach wjesłowarjow dla dyrbjachu wubědźowanje w Awstriskej wospjetować. Po zražce pólskeje dwójki z čołmom sudnikow w štwórćfinalu na pódlanskej rěce Dunaja so swětowy zwjazk rozsudźi, wurisanje hišće raz přewjesć. Při hawariji je so wjesło pólskeho čołma złamało.
Trjebamy dźensa mudrje jednace žony
Dr. Marja Grólmusec bě pytaca demokratka křesćanskeho a socialneho zmyslenja
Budyšanka Cosima Strakojc-Nawka měješe swjedźensku narěč na wopomnjenskim zarjadowanju 6. awgusta w Radworskej „Meji“. Tón dźeń před 75 lětami zemrě Serbowka dr. Marja Grólmusec w žónskim kaceće Ravensbrück. Serbske Nowiny tule swjedźensku narěč dokumentuja, dokelž zhladuje na wosobu, wo kotrejž je mjez ludnosću často hišće njedospołny, jednostronski wobraz rozšěrjeny.
Lube žony, lubi přećeljo, waženi hosćo!
Je to wažne so prašeć, štó je Marja Grólmusec była? Abo je wažniše wědźeć, što je wona činiła? Čehodla je tale mnohim ludźom njeznata žona dźensa hišće zajimawa?
Hdyž z hory Mužský klinčeše hłós tysacow ludźi
Wažne manifestacije w stawiznach čěskeho a serbskeho naroda
Hora Mužský blisko čěskeho městačka Mnichovo Hradiště je dźensa přewažnje znata jako městno, w tamnišej kónčinje rjenje silwester swjećić. W stawiznach pak ma wona wo wjele wjetši wuznam za čěski lud, ale tež za nas Serbow.
Tam na horje respektiwnje pola hrodu Valečov wotmě so 12. julija 1868 ludowa manifestacija, kotraž pak bě wot rakuskich zarjadow zakazana. Najebać to so tam na 2 000 ludźi zhromadźi. Někotrych z nich su po tym zajeli. Reagujo na tónle podawk zeńdźe so lěto pozdźišo 11. julija něhdźe 40 000 ludźi z cyłeje wokoliny, zo bychu tam za wotmołwy na slědowacej prašeni demonstrowali:
1. Kak skutkujetej literatura a žurnalistika na wuwiće zjawneho narodneho žiwjenja?
2. Što je přičina sylnje wuwiwaceho so wandrowstwa a kak móhli tomu zadźěwać?
Tomule trochu dźiwnje sformulowanemu zaměrej zetkanja rakuske hejtmanstwo přizwoli.
Něšto wjace bjezdźěłnych
Nürnberg (dpa/SN). Ličba bjezdźěłnych w Němskej je tónle měsac na 2,319 milionow rozrostła. To je 44 000 wjace hač w juliju a 31 000 mjenje hač před lětom, zdźěla Zwjazkowa agentura za dźěło. Kwota bjezdźěłnosće zwyši so na 5,1 procent. Tež w Sakskej je trochu wjace bjezdźěłnych, w Braniborskej pak mjenje. Sezonalne wuwiće je w tym počasu typiske. Kaž regionalna direkcija informuje, je po šuli, studiju a wukubłanju wjace młodych ludźi na dźěłowych wikach.
Grjekski premier w Němskej
Berlin (dpa/SN). Sydom tydźenjow po nastupje zastojnstwa přebywa nowy grjekski ministerski prezident Kyriakos Mitsotakis dźensa w Berlinje. W rozmołwje ze zwjazkowej kanclerku Angelu Merkel (CDU) chcyše konserwatiwny knježerstwowy šef za němske inwesticije w Grjekskej wabić. Nimo toho dźěše wo migraciju. Nowinarjo z tym ličachu, zo premier Mitsotakis tež prašenje němskich reparacijow za načinjene škody w Druhej swětowej wójnje narěči.
Conte ma knježerstwo zestajeć
Zhorjelska policajska direkcija je wčera na wšěch namjeznych ...
Chwalba, ale tež kritika nastupajo wobzamknjenje
Drježdźany (dpa/SN). Sakski minister za hospodarstwo Martin Dulig (SPD) wita wčerawše wobzamknjenje zwjazkoweho knježerstwa nastupajo strukturnu změnu w krajach, kotrež su wot brunicy potrjechene. „Na tutón signal zwjazkoweho knježerstwa smy dołho čakali. Wobzamknjenje je wažne a prawe za ludźi w potrjechenych kónčinach Łužicy a srjedźoněmskeho rewěra. Trjebamy signal Zwjazka, zo njebudu ludźo sebi samym přewostajeni. Zmilinjenje brunicy w lěće 2038 skónčić bě politiski rozsud. Tuž ma politika wosebitu zamołwitosć za potrjechenych. Dźensniši dźeń je wažny měznik, zwoprawdźić wobzamknjenja wuhloweje komisije“, rěka w stejišću Duliga.
