Jenož remis hrali

póndźela, 22. awgusta 2016 spisane wot:

FC Energija Choćebuz

– FC Viktoria Berlin 1:1 (1:1)

Zestawa domjacych: Meyer – Baude, Knechtel, Stein, Karbstein, Kruse, Putze (58. Förster), Weidlich (86. Müller), Viteritti, Gehrmann (39. Ziegenbein), Mamba

Tež po třećej dypkowej koparskej hrě noweje sezony w regionalnej lize čaka FC Energija Choćebuz dale na prěnje dobyće. Njerozsudnymaj wuslědkomaj 1:1 pola Lok Lipska a 0:0 přećiwo rezerwje RB Lipska slědowaše 1:1 přećiwo Viktoriji Berlin.

Běše-li 1:1 přećiwo „bykam“ hišće njezbožowne, dyrbjachmy po 90 mjeńšinach přećiwo koparjam ze zwjazkoweje stolicy wo sprawnym remisu rěčeć. Łužičenjo njezamóchu cyle jednorje porjadne kombinacije natwarjeć a sej z nimi prawe šansy wuhrać. W druhim połčasu měješe Stein (85.) jeničku móžnosć za mustwo, kotrež dyrbjało skónčnje raz dobyć. Nawjedowanje nutřkowneho škitarja Philippa Knechtela měješe jenož krótke wobstaće, dokelž hosćo pjeć mjeńšin pozdźišo wurunachu. Hrubeho hraća hosći dla dyrbještaj Joshua Putze (58.) a Kevin Weidlich (86.) zranjenaj trawnik wopušćić.

Ze sćerpnosću k wuspěchej

póndźela, 22. awgusta 2016 spisane wot:

Sokoł Ralbicy/Hórki – ST Kinspork/Łužnica 2:0 (0:0)

Zestawa domjacych: Ch. Gloxyn – Matka, Domaška, Schultz, Lulak, Šewc, S. Bjeńš, D. Gloxyn, Korjeńk, Wowčerk, Kurjat­ (46. B. Bjeńš)

Ke koparskej hrě witaše Sokoł Ralbicy/Hórki wčera mustwo z Kinsporka/Łužnicy. Te bě swoju prěnju hru doma přećiwo Kumwałdej z 3:0 dobyło, štož bě delanskim koparjam warnowanski signal. Tohodla hru wot spočatka na lochke ramjo njewzachu. Pětr Domaška bě znowa w škiće zasadźeny, dokelž Bosćij Bjeńš zranjenja dla najprjedy raz wospjet na ławce sedźeše. Gabriel Kurjat jako jenički nadběhowar měješe přez cyły prěni połčas swoje ćeže přećiwo sylnemu škitej hosća. Najwjetšu ćežu pak měješe Stanij Šewc, kiž njezamó bul z třoch (!!!) metrow přez liniju sunyć. Přećiwniski wrotar jón hišće z refleksom wotwobara (30.). Hra bě dale bojowniska a wobě mustwje njeměještej žane jasne šansy.

Awtor dźensa Michał Nuk

Zaso su olympiske hry nimo. Wězo sym kaž kóždy raz hodźiny před telewizorom abo live-streamom sydał a so nad medaljemi a wurjadnymi wukonami sportowcow wjeselił – mjez druhim nad złotej medalju rodźeneho Lubijčana Christiana Reitza w třělenju z pistolu. Přiwšěm su hry w Rio de Janeiru we mni kopicu prašenjow zawostajili. Ženje do toho njejsym fairnosć a olympiske moto „Pódla być je wšitko“ bóle parował, ženje njejsym nad zmysłom wuhotowanja olympiady a z tym zwisowacymi wopo­rami za ludnosć, přirodu a infrastrukturu bóle dwělował hač lětsa. Štóž je rozprawnistwo w minjenych měsacach trochu dokładnišo­ slědował, tomu je wědome, zo so doping mjeztym po cyłym swěće w nimale wšitkich sportowych družinach kaž hydra rozpřestrěwa, přećiwo kotremuž je bój nimale bjezwuhladny. A hdyž stanje so prašenje za wobšudnistwom w sporće z politikumom kaž w padźe Ruskeje, dyrbiš so chutnje prašeć, kotry mjezynarodny abo narodny sportowy zwjazk so scyła hišće­ za čistych sportowcow zasadźa.

Wuslědki (22.08.16)

póndźela, 22. awgusta 2016 spisane wot:

Wokrjesna koparska wyša liga

Kumwałd – Ottendorf-Okrilla 4:1 (2:1)

Połčnica – Drohotka Ramnow1:1 (0:1)

Großröhrsdorf – Wojerowski FC1:0 (1:0)

Kulow – Rakecy1:1 (1:0)

Hnašecy-Dobruša – Hory 3:3 (0:1)

Ralbicy/Hórki – Kinsp./Łužnica 2:0 (0:0)

ST Wjelećin – ST Ćisk 1993 0:6 (0:2)

1. ST Ćisk 1993 2 12 :0  6

2. SC Großröhrsdorf 2 2 :0  6

3. Sokoł Ralbicy/Hórki 2 3 :1  4

4. ST Hnašecy-Dobruša 2 4 :3  4

5. ST Kinspork/Łužnica 2 3 :2  3

6. Póst Germania Budyšin 1 1 :0  3

7. Motor Kumwałd 2 4 :4  3

8. LSV Hory 1920 2 4 :4  2

9. Módro-běli Kulow 2 2 :2  2

10. Zeleno-běli Bukecy 1 1 :1  1

11. Wojerowski FC 2 1 :2  1

11. Rakečanske ST 2 1 :2  1

11. Drohotka Ramnow 2 1 :2  1

14. ST Wjelećin 2 1 :7  1

14. TSV Połčnica 1920 2 1 :7  1

16. FV Ottendorf-Okrilla 05 2 1 :5  0

Sport (19.08.16)

pjatk, 19. awgusta 2016 spisane wot:

Satkula-beachvolleyball

Póndźelu, 22. awgusta, je lětuše finale wo pokal Radija Satkula, a to w Miłočanskej Bobkec jěchanskej hali. Kaž hižo loni tež lětsa zaso Serbski Sokoł turněr zarjaduje. 16 mustwow je so přizjewiło. Wone maja so w 17.30 hodź. zapisać, dokelž so hry we 18 hodź. započnu. Radijo Satkula wot 20 do 22 hodź. live wusyła.

Na Powerserb

Radworska młodźina přewjedźe jutře, sobotu, wot 15 hodź. jako zakitowar pokala zhromadnje ze serbskim młodźinskim towarstwom Pawk lětuše sportowe wubědźowanje Powerserb. Jedne mustwo ma wobstać ze znajmjeńša pjeć ludźi, maksimalnje sydom (šesta a sedma wosoba ma holca być). Startowy pjenjez wučinja 10 eurow na mustwo. Po wubědźowanju přizamknje so spěwny wječor.

Wobory so wubědźuja

28.08. 13:00 w Sulšecach pola Kulowa

16.09. 18:00 we Wotrowje

Poběhnu na Běłobóh

Njedźelu, 28. awgusta, přewjedu we Wopakej 37. běhi na horu Běłobóh. Budu to distancy wot 1,5 hač do 20 kilometrow. Startowy čas za wšitke běhi budźe w 10 hodź. Přidatne informacije a při­zjewjenske modality pod www.baer-ser­vice.de

Kónctydźenska kopańca

pokalne hry

19.08. 18:30 Kamjenc – Niska

21.08. 14:00 Inter Lipsk – Budissa

Bratraj olympiski triatlon dominowałoj

pjatk, 19. awgusta 2016 spisane wot:

Rio de Janeiro. Sobu najrjeńši, ale tež woprawdźe pót ćěrjacy napohlad wuprudźachu wčera triatleća na swojim wubědźowanju. Čara wjedźeše kralow wutrajneho sporta kołowokoło Copacabany. Po 1,5 kilometrach we wodźe, 40 km na kolesu a 10 km w běhanskich črijach­ staj wulkobritaniskaj bratraj Brownlee konkurencu deklasěrowałoj. Starši bratr a zdobom­ zakitowar titula Alistair wyskaše před swojim bratrom Jonathanom­ a Henrijom Schoemanom z Južneje Afriki.

Něhdźe 20 kilometrow dale, při zaliwje Guanabara, wjeseleštaj so němskaj płachtakowarjej nad njewočakowanej bronzowej medalju. Před lětom bě so Erik Heil zanjerodźeneje wody tohole zaliwa dla z rezistentnymi bakterijemi inficěrował. Wčera pak měješe z partnerom Thomasom Plößelom zbožo skerje na swojej stronje. W finalu profitowaše němska dwójka, dokelž bě so płachtak Britow krótko do cila powróćił.

Wrota kaž zrałe płody padali

štwórtk, 18. awgusta 2016 spisane wot:

SZ Módro-běli Njeswačidło

– Sokoł Ralbicy/Hórki 6:3 (3:3)

Za hosći zasadźeni: Cyž – Materna, M. Matka, Kobalc, T. Matka (80. Šnajder), Bogusz, Serbin (50. J. Matka), Bejma (50. Młynk), Čórlich, Kurjat, Šwejda

Koparjo Sokoła Ralbicy/Hórki su hru derje započeli. Přez staciji Tomaš Bejma a Šwejda dósta Kurjat bul, třěli pak jón wyše wrotow. Po 15 min. zawinowachu Sokoljo wólny kop. Cyž jón jenož doprědka placny, a Scholze suny bul do klětki. Mjeńšinu pozdźišo Kurjat z přetworjenej jědnatku wuruna. W 22. min. wotpopadny škit Sokoła bul a Bejma přihra bul spěšnemu Čórlichej, kiž jón pó­dla wrotarja do wrotow storči. Domjacy wurunachu znowa přez Scholzu, jako so tón po flance wokoło škitarja zwjertny a Cyža přelišći. Krótko do połčasa Bejma ze 40 metrow do syće trjechi. A znowa Njeswačenjo wurunachu.

W 50. min. bu Bejma wuměnjeny a Sokoljo zhubichu swoju hrajnu nitku. Dwójny dyr Sendy w 52. a 55. min. jim rjap złama. Bul dósta so wobaj razaj do šěsnatki, tam bu wróćo hraty a Cyž běše bjez šansy. W 84. min. docpě Sende samo hattrick, jako jědnatku wěsće přetwori.

Dobry zazběh

štwórtk, 18. awgusta 2016 spisane wot:

ST 1922 Radwor

– LSV Hory II 3:0 (3:0)

Zestawa domjacych: Wróbl – Mark, Šěrak­ Fabian, Henka, Zähr, Hančik (53. Omran), Šram, von Karwin, Bejmak, Schulze, Buša (73. Sćapan)

W nowej sezonje nastupaja Radworscy koparjo w stafli 2 wokrjesneje ligi. Dalša nowosć je, zo smě klětu jeničce dźesać z tuchwilu 14 mustwow w tutej stafli wostać. Nowačkaj-koparjej w Radworju staj Křesćan Bejmak, kiž je wot Sokoła Ralbicy/Hórki přišoł, a Paul Zimmermann. Wón dyrbješe sej nowy hrajny cyłk pytać, dokelž bě Budissa Budyšin swoje mustwo U 23 wotzjewiła.

Wosebje mustwa sylne wukony pokazuja

štwórtk, 18. awgusta 2016 spisane wot:

Rio de Janeiro. Tón abo tamny němski sportowy zamołwity měješe do olympiskich hrow zawěsće brjušebolenje, dźěše-li wo šansy němskich wubrankow w mustwowych sportowych družinach. Wjacore wubranki njemóžachu so mjenujcy za lětuše olympiske hry w Brazilskej kwalifikować. Tak běchu na přikład hrajerjo wodobula, volleyballisća w hali, basketballisća abo žónske narodne mustwo w mjetańcy hižo na kwalifikaciskich turněrach zwrěšćili a móža nětko sportowy wjeršk jenož w telewiziji sćěhować. Změrowaca powěsć pak je, zo nimale wšitke kwalifikowane mustwa wo medalje wojuja.

Před gigantiskej kulisu, w stadionje při Copacabanje, stej beachvolleyballistce Laura Ludwig a Kira Walkenhorst tež w finalnej hrě domoródnej dwójce Agatha/Barbara bule jenož tak wokoło wušow smykałoj. Prěni žónski beachvolleyballowy porik Europy smě so tuž nětko olympiski dobyćer mjenować.

Wuslědki (18.08.16)

štwórtk, 18. awgusta 2016 spisane wot:

Wokrjesna koparska liga, stafla II

Njeswačidło – Ralbicy II 6:3 (3:3)

ST 1922 Radwor – LSV Hory II 3:0 (3:0)

1. Módro-běli Njeswačidło 1 6  :  3 3

2. ST 1922 Radwor 1 3  :  0 3

3. Wojerowski FC II 1 4  :  2 3

4. ST Ćisk II 1 3  :  1 3

4. HZ Wulke Ždźary 1 3  :  1 3

6. Rakečanske ST II 1 2  :  0 3

7. ST Lubuš 1 2  :  2 1

7. HZ Łaz/Běły Chołmc 1 2  :  2 1

9. LSV Bluń  1 2  :  4 0

10. FSV Łuty 1 1  :  3 0

10. ST Nadrózna Hrabowka 1 1  :  3 0

12. Nowe Město n. Spr. II 1 0  :  2 0

13. Sokoł Ralbicy/Hórki II 1 3  :  6 0

14. LSV Hory II 1 0  :  3 0

Serbska debata

nowostki LND