Sudnik prěnjemu dypkej Chróšćanow zadźěwał
FSV 1990 Nowosólc-Hródk
– SJ Chrósćicy 3:2 (1:1)
Zestawa hosći: Králíček – Schulze, Cyž, Sentivan, Teichmann (90. Dórnik), Dehn (71. Hillmann), Runt, Domaška, Henčl, Věchet, Žur (87. Młynk)
Chróšćanscy koparjo nastupichu wčera pola FSV 1990 Nowosólca-Hródka. Do hry běštaj trenarjej Runt/Latkolik za to slědowacu dewizu nastajiłoj: Z kruteje defensiwy měješe so wosebje na to dźiwać, zo njezapopadnu sej jeju chowancy njetrjebawše wrota. Tola hižo po 11 mjeńšinach tale taktika zwrěšći. Škit a srjedźne polo běštej so předaloko doprědka zwažiłoj, tak zo docpě přećiwnik po nadběhu přez lěwe křidło 1:0. Jenička dobra akcija Chróšćanow w prěnim połčasu wjedźeše k zasłuženemu wurunanju. Po dołhej třělwje Cyža zhłójčkowa Žur kulowatu kožu dale na Věcheta, kiž ju z 15 metrow do praweho kuta smokny.
7. Połčničanski strowotniski běh
Při chětro tužnym a wětřikojtym wjedrje wubědźowaše so 395 běharjow a běharkow a 72 lubowarjow walkinga we wobłuku 7. Połčničanskeho strowotniskeho běha na distancach wot 0,8 hač do 10 km. Starterojo dyrbjachu na pjeć kilometrowskej kołočarje, kotraž wjedźeše nimo najwyšeho dypka čary – pomnik Schwedenstein – 120 metrow wysokostneho rozdźěla zmištrować (10 km dwójce). Mjez sportowcami, kotřiž běchu hłownje ze Sakskeje a Braniborskeje, něhdźe třicećo z Pólskeje a Čěskeje a dźesatk samo z Hamburga, wojowaše z brawuru tohorunja dźesatk serbskich entuziastow.
Na 2 km zawěsći sej gymnaziastka Larissa Měrćinkec z Chelna cyłkowne dobyće w spěšnych 8:15 min. Na 5 km rěkaštaj cyłkownaj dobyćerjej Lilli-Marlen Reichwald (Budyšin) a Georg Bär (Drježdźany). Ze serbskich starterow wubědźištaj sej w swojej starobnej skupinje (sk) 2. městno Manuela Jurkowa z Łupoje (sk 30/26:29 min.), štož běše jara dobre cyłkowne 9. městno, a Jurij Nuk z Budyšina (sk 80/41:41 min.). Maik Šołta z Worklec bu dźesaty w sk 40 (36:08 min.).
Serbscy starterojo wuspěšni
Wojerowski a Budyski měšćanski běh znowa samsny dźeń přewjedli
1 696 běharkow a běharkow je so sobotu w Budyšinje na 23. Budyskim měšćanskim běhu wobdźěliło, 1 820 we Wojerecach na 10. cityjowym běhu. Njebyštej-li wobě zarjadowani samsny dźeń byłoj, bychu w Budyšinje a nawopak we Wojerecach zawěsće tójšto wobdźělnikow wjac měli. Serbske běharki a serbscy běharjo wubědźowachu so na woběmaj městnomaj. We Wojerecach je sej Fabienne Wjacławkec z Ralbic na distancy 2 km druhe městno wubědźiła. W kónčnym spurće pobrachowaše jej, kotraž startowaše za Serbski gymnazij Budyšin, jedna sekunda k dobyću. Podestne městna, na kotrychž stejachu Serbja, smy tež w Budyšinje měli. Jurij Nuk (Čerwjeno-běli Budyšin 90) na přikład bě na čarje 5,6 km w swojej starobnej klasy (sk) druhi, Juraj Nuk (OSLV Budyšin) na distancy 1200 metrow třeći, Sarah Bretschneiderec (Serbska wyša šula Budyšin) na samsnej čarje w sk prěnja, Anabelle Lodnijec (Serbska wyša šula Budyšin) w sk na 1,2 km tež prěnja a Handrij Bejmak (ST Budyšin) w swojej sk na hłownej distancy 9,3 km třeći.
Znowa mišter
Po čarje 12 km najsylniše polo atletow
Serbscy atleća na 37. Wopačanskim Běłobóskim běhu běchu Larissa a jeje mać Corinna Měrćinkowa, Richard Paška, Roman Měrćink a Jan Krawc. Cyłkownje je 280 starterow cil docpěło. Jednotliwe distancy běchu 1,5 km; 4,9 km; 12 km a 20 km. Naročnej najdlěšej čarje 12 a 20 km wjedźeštej přez wjeršk 500 metrow wysokeho Běłoboha.
We wurisanju na 4,9 km běštaj cyłkownaj dobyćerjej Jacobine Behrisch z Radeburga (21:30 min.) a Markus Bär ze Załomja (18:57 min.). Serbska gymnaziastka Larissa Měrćinkec wubědźi sej z 30 běharkow wulkotne cyłkowne 2. městno (22:13 min.), štož běše tež slěborne městno w skupinje U 14. Ze štyrjoch žonow, kotrež so na tejle distancy we walkingu wubědźowachu, doběža jeje mać Corinna Měrćinkowa w 35:51 min. jako prěnja do cila.
Najsylniše polo starterow Běłobóskeho běha poda so na distancu 12 km (91 atletow). Cyłkownaj dobyćerjej běštaj Susanne Mielsch z Niskeje (1:04:06 hodź.) a Paul Hentschel ze Žitawy (49:31 min.). Roman Měrćink z Baćonja bě dobyćer w starobnej skupinje 20 (58:34 min.); cyłkownje bě wón třinaty.
Widźał, słyšał, napisał (12.09.16)
Awtor dźensa
Stefan Šmit
Dwě dobyći a dwaj remisaj. W sumje wučinja to wosom dypkow. K tomu maja koparjo Dynama Drježdźany nětko wrotowy poměr 6:3. Za tónle dotal wuběrny wukony steja woni po wčerawšim štwórtym hrajnym dnju na 2. městnje druheje zwjazkoweje koparskeje ligi. Štó z nas bě sej tole na spočatku sezony myslił, wšako njebě zazběhowy program za Dynamo docyła tak lochki. Jako prěni přijědźechu koparjo z Nürnberga. Tydźeń na to wobstachu Dynamowcy suwerenje před wulkotnej kulisu pola Union Berlina. W prěnim kole DFB-pokala porazychu samo prěnjeho ligista RB Lipsk. Nimale samsna bě atmosfera před tydźenjomaj, jako bě kultowe mustwo St. Pauli w Drježdźanach. Runja RB Lipskej dyrbješe so mustwo z Hamburga bjez dypka na domojjězbu nastajić. A nětko 2:0 za Dynamo w Hannoveru!
Wuslědki (12.09.16)
Krajna koparska klasa
Nowe Město – Zschachwitz 3:1 (3:0)
Drježdźanski SC – Trjebin 7:2 (2:0)
Neugersdorf II – Weixdorf 4:2 (2:1)
Biskopicy II – Horni kraj Sprjewja 1:1 (0:1)
Mužakow – Radebeul 2:0 (1:0)
Nowosólc-Hródk – Chrósćicy 3:2 (1:1)
1. Horni kraj Sprjewja 3 7 : 3 7
2. Radebeul 3 4 : 3 6
3. Zschachwitz 3 7 : 7 6
4. Mužakow 2 4 : 2 4
5. Nowosólc-Hródk 2 5 : 4 4
6. Drježdźanski SC 2 8 : 5 3
7. Laubegast 2 5 : 3 3
8. Neugersdorf II 2 5 : 4 3
9. Nowe Město 3 3 : 5 3
10. Trjebin 2 5 : 8 3
11. Weixdorf 3 4 : 7 3
12. Biskopicy II 2 3 : 4 1
13. Chrósćicy 3 4 : 9 0
Sport (09.09.16)
Prěnje WORKWUB
Jutře, sobotu, wotměje so we Worklecach prěnje WORKlečanske WUBědźowanje – WORKWUB. Sportowe towarstwo Viktoria a Worklečanske młode swójby přeprošeja na sportowe popołdnjo. Wot 14 hodź. móža dźěći sportowe znamješko złožić. Skakanski hród a sportowy mobil stej dalšej móžnosći so prawje wucychnować. W 16 hodź. započnje so prěni oficialny WORKWUB – staflowy běh. Najspěšniši čas a najoriginelniši kostim budźetej mytowanej. Zetkanišćo je sportnišćo za šulu.
Budyski měšćanski běh
W sprjewinym měsće přewjedu jutře wot w 10 hodź. 23. Budyske měšćanske běhi. Dopołdnja a připołdnju wubědźuja so dźěći a šulerjo, hłownej běhaj na 5,6 a 9,3 km budźetej w 14 hodź.
Wojerowski cityjowy běh
Samsny dźeń wubědźuja so běharki a běharjo we Wojerecach. Dźesaty króć přewjedu tam cityjowy běh HOYWOJ-DAK. Prěnje běhi započnu so w 11.30 hodź., hłowny na 10 km budźe w 16.45 hodź.
Dumpery so wubědźuja
Štwórty běh wo němske dumperowe mišterstwa wotměja zajutřišim, njedźelu, w delnjołužiskim Drjowku. Tam wubědźuja so dumperowcy wot 14 hodź.
Blidotenisowa doba so započnje
Dobru moralku pokazali
SJ Njebjelčicy
– Liegau-Augustusbad 2:2 (0:2)
Zestawa domjacych: D. Ričel – Hrjehor (83. Šram), Pawlik, Haška, Cyž, Hanuza, F. Ričel (27. Kubaš), Šołta, Čornak, Lejnart, Korjeńk
Tež w domjacej hrě přećiwo cyłkej z Liegauwa-Augustusbada dyrbjachu koparjo Njebjelčanskeje SJ zestawu změnić. Tak pobrachowaše we wšěch mustwowych dźělach w prěnim połčasu wěsta linija. Woni chcychu wot wšeho spočatka ćišć na přećiwnika wukonjeć, štož pak so njeporadźi. W dwubojach běchu často kročel přepozdźe a w natwarje worachu zmylki. Chowancy trenarskeho duwa Panic/Krawčik drje mějachu hru pod kotrolu, ale njemóžachu sej žane jasne šansy wuhrać. W 29. min. porno tomu hosćo prěni raz wyskachu. Wrota běchu rezultat wjacorych zmylkow domjacych. Krótko po tym poradźi so přećiwnikej w 36. min. samsny wotběh, a nadběhowar so z 0:2 podźakowa.
Mnóstwo šansow njewužiwali
ST Marijina hwězda
– SC Großröhrsdorf II 1:1 (1:0)
Zestawa domjacych: O. Schmidt – Wróbl, T. Škoda, Jurš, Smoła, Peschmann, Bělk, Hawš, P. Schmidt, Pakoßnick (57. A. Škoda), Winkler (72. Wagner)
Po skepsanym starće do sezony mějachu koparjo prěnjeho mustwa ST Marijineje hwězdy winowatosć, domjacu hru dobyć. Hižo w 3. min. ležeše bul we wrotach hosći. Po flance Smoły bě jón Peschmann do saka stłóčił. Nětko Pančičenjo hru postajachu. Wuprudźachu wulku wěstotu při přihrawkach a pokazachu sylny běhanski wukon. Pakoßnick (6.), Schmidt (22.) a Hawš (27.) pak njeběchu ze swojimi třělwami na wrota wuspěšni. W 35. min. wuchowachu hosćo kop Jurša na wrotowej liniji. Woni mějachu w prěnim połčasu jenož jednu šansu, Tobias Škoda pak znješkódni ju na liniji (41.).
