Chěžu twarjacy roboter je awstralske předewzaće wuwiło. Po informacijach firmy z města Perth trjeba mašina z mjenom „Hadrian“ runje dwaj dnjej, zo by wonkowne murje domu stajiła. Z 28 metrow dołhej teleskopowej ruku móže tysac cyhelow wob hodźinu kłasć. Dźěło wotběži dospołnje awtomatisce. W běhu lěta chcedźa 150 domow z roboterom natwarić. Firma hižo dźesać lět na swojim rewolucionarnym nastroju dźěła.
Na awtodróze běhaca kóčka je šoferku na A4 w Durinskej k přewšo zwažliwej pomocnej akciji pohnuła. Po informacijach policije žona na nabóčnej čarje zasta a spyta najebać wulki wobchad wustróžane zwěrjo popadnyć, kotrež bě sej na srjedźne wobhrodźenje awtodróhi wućeknyło. Při tym žona jězdnju dwójce přeprěči. Skónčnje pak wołaše policiju wo pomoc, a wona kóčku popadny.
Dalšu bombu našli
Choćebuz (dpa/SN/ch). Twarscy dźěłaćerjo su wčera w nutřkownym měsće Choćebuza dalšu bombu ze swětoweje wójny našli. „Bomba njeměješe zapalak“, praji rěčnik. Alarm njebu tuž wuwołany. Połsta kilogramow ćežku bombu wčera dopołdnja wottransportowachu. Hižo dźeń do toho běchu twarscy dźěłaćerjo na samsnym městnje pjećstow kilogramow ćežku bombu našli. Dokelž njebě najprjedy jasne, kaž ma bomba zapalak, dyrbjachu tysacy Choćebužanow swoje bydlenja wopušćić. Tež Serbski dom su ewakuowali.
Wuspěšne tarifowe jednanja
Drježdźany (SN/JaW). Brunica a aktualne wuwiće we Łužicy běštej hłownej temje wčerawšeho posedźenja Rady za serbske naležnosće Sakskeje w Drježdźanach. Předsyda Domowiny a zdobom čłon sakskeje serbskeje rady Dawid Statnik w tym zwisku zwěsći, zo je tuchwilne połoženje předewšěm za potrjechenych chětro ćežki a njepřijomny čas. Serbska rada ma tuž namjetowane załoženje tak mjenowaneho Łužiskeho fondsa, kotryž měli wutworić krajni a zwjazkowi politikarjo, za zmysłapołne.
Brüssel (dpa/SN/K). Posledni dźeń za Grjeksku pod wuchownym krywom. W nocy na srjedu so mjezynarodny pomocny program kónči. Jedyn ze sćěhow je, zo njemóže Grjekska IWF k terminej 1,54 miliardow eurow wróćić. Kaž premier Alexis Tsipras w telewiziji rjekny, knježerstwo ratu njepřepokaza, chibazo dóńdźe hišće w poslednim wokomiku k spokojacemu dojednanju z mjezynarodnymi pjenjezydawarjemi.
Krótko do ultimatuma su němscy Zeleni eurokraje a Athenske knježerstwo namołwili, sydnyć so za jednanske blido. Kanclerka Angela Merkel (CDU) přilubi, njezawrěć so dalšim jednanjam, by-li Athen po referendumje wo nje prosył. „Chce-li něchtó z nami rěčeć, smy k tomu kóždy čas zwólniwi“, Merkel w grjekskej telewiziji zwurazni, „woprašowanje luda ma zaměr, pokročować z jednanjemi.“ Dźiwajo na hrožacy statny bankrot spyta Europa Grjekow motiwować za paket pjenjezydawarjow nastupajo reformy a lutowanje. „Kóžde ,ně‘ w referendumje je ,ně‘ napřećo Europje“, rjekny šef komisije EU Jean-Claude Juncker.
W Budyskim Kamjentnym domje debatowachu minjeny pjatk wo wěstoće w pomjeznej kónčinje. Terorowe nadpady w Tuneziskej, Francoskej a Kuweiće běchu přiwšěm prezentne.
Budyšin (CS/SN). „To bě grawoćiwy dźeń“, rjekny zwjazkowy nutřkowny minister Thomas de Maizière (CDU) hladajo na podawki tohole dnja. Zdobom wón něhdźe 80 wopytowarjow Budyskeho Kamjentneho domu wo zrozumjenje prošeše, zo dawa so na mobilnym telefonje wo najnowšim połoženju běžnje informować. Najebać to pak wotmołwješe suwerenje na prašenja přihladowarjow a kandidata CDU za zastojnstwo Budyskeho wyšeho měšćanosty Matthiasa Knaaka. Te poćahowachu so na wěstotne połoženje w Němskej, wosebje w pomjeznej kónčinje kaž tež na problemy z wopojnym jědom crystal a wo přiwzaće ćěkancow.
Lipsk (B/SN). Hrodowa cyrkej w Lipsku-Lützschenje je po 160 lětach swój gotiski Marijanski wołtar wróćo dóstała. Na swjatočnej Božej słužbje 28. junija móžachu dospołnje restawrowany wołtar zaso wužiwać. Wječor do toho přednošowaše farar Stefan Ziegelschmidt na temu „Što nas ewangelskich wěriwych Marija stara?“ Zwuporjedźeć 500 lět stary wołtar bě móžno dźakowano mnohim pjenježnym daram a spěchowanskim srědkam. Marijanski wołtar z Lützscheny bě najskerje w druhej połojcy 15. lětstotka nastał a steješe wot lěta 1947 w Lipšćanskim historiskim muzeju.
Zhromadnje za ćěkancow
Z 72 lětami maturu wobstał je rentnar Robert Spieß we Wiesbadenje. Wčera přepodachu jemu na statnej šuli za dorosćenych wuswědčenje. Z nětko zdobytej powšitkownej wysokošulskej zrałosću (přerězk 2,5) chce Spieß w Mainzu žurnalistiku studować. Za tónle masterski studij wšak trjeba wuměnkar hišće akademiski schodźenk bachelora. Nětko pak chce so najprjedy wot napinanja maturitnych pruwowanjow wočerstwić, kaž wón rjekny.
Kradnjeny mobilny telefon w spódnich cholowach paducha namakała je policija w Bremenje. Dokelž měješe 19lětny hišće dalšej telefonaj při sebi, jeho zastojnicy zajachu. 23lětna wobsedźerka bě zastojnikow wołała, po tym zo bě jej 19lětny telefon pokradnył. Z pomocu wěstotneje software woni zwěsćichu, zo je paduch w tramwajce, kotruž zadźeržachu.