Nimale kóžde sportowe towarstwo pěstuje přećelske styki z dalšim zjednoćenstwom, z kotrymž so zetkawa a wuměnja. Jeli tajke zwiski k tomu hišće lětdźesatki wobsteja, je to hižo wosebitostka. Tajke wobstajne krute přećelstwo hajitej na přikład DJK Sokoł Ralbicy/Hórki a čěski TJ Sokol Spálené Poříčí.
Kaž je hižo z dołhej tradiciju, chcychu so spočatk julija zaso něhdyši kaž tež tučasni čłonojo delanskeho towarstwa z čěskimi přećelemi zetkać. Lětsa chcychu w Čěskej 55. wuměnu woswjećić, tola koronapandemije dla z toho ničo njebu. Hana Krawcowa z Ralbic, kotraž čěsko-łužisku wuměnu organizuje, praji: „Planowane na zbožo hišće ničo njebě. Wšako dołho dosć wědźachmy, zo lětsa najskerje žana wuprawa njebudźe.“