Łužiske liški Běła Woda – ­Lodowi piraća Crimmitschau 3:1 (1:0; 2:1; 0:0)

Lodohokej je druhdy chětro spodźiwny. Prěnjej derbyjej hrajneje doby běchu Łužiske liški přećiwo zapadnym Saksam z 2:3 a 3:4 přěhrali, byrnjež wobaj razaj lěpši byli. Tónkróć bě wšitko nawopak. Hosćo z Crimmitschauwa pokazachu 40 mjeńšin dołho wjele kmańši lodo­hokej, po dwěmaj třećinomaj hry pak nawje­dowachu Hornjołužičenjo hižo 3:1. To bě zdobom tež kónčny wuslědk, dokelž w poslednich 20 mjeńšinach Lodowi piraća mudrje zakitowachu.

Kaž hižo naspomnjene, hosćo partiju wot spočatka dominowachu. Jako pak běchu prěni raz z mužom mjenje na hrajnišću, steješe nadobo 1:0 za domjacych. Andrew Clark prasny gumijowu ta­čel­­ wot módreje linije na wrota. Při prawej žerdźi steješe Ondřej Poživil, a tón za Běłu Wodu přetwori.