Politikarjo zwyšeja sej mzdy wosrjedź koronapandemije

Waršawa. Takrjec přez nóc su sej zapósłancy pólskeho parlamenta minjeny kónc tydźenja swoje mzdy chětro zwyšili. Dźeń pozdźišo bě noworjadowanje hižo w zakonskim łopjenu wozjewjene a je tak płaćiwe. Prezident kraja Andrzej Duda je ze swojim podpismom mzdy parlamentnikow zwyšił, złožujo so na zakoń z lěta 2002. Praktisce to rěka, zo dóstanje 460 zapósłancow sejma a 100 čłonow senata wot 1. awgusta měsačnje 60 procentow wjace pjenjez, město dotal 8 000 nětko 13 000 złotych (3 250 eurow). Takrjec z ryzy dźakownosće chcedźa zapósłancy nětko tež mzdu prezidenta zwyšić. Wjace płaćić budu tohorunja ministerskemu prezidentej, ministram, měšćanostam a čłonam měšćanskich radow. Tež předchadnicy prezidenta Dudy – Bronisław Komorowski, Aleksander Kwaśniewski a Lech Wałęsa – móhli z toho profitować.