Kolumbiska je swoju prěnju skupinsku hru na swětowym mišterstwje kopańcy žonow dobyła. Přichodny přećiwnik Němskeje přewiny Južnu Koreju wčera w Sydneju z 2:0. Južnoameričanki pokazachu při tym wosebje w druhim přechodźe, zo maja potencial, so stać z překwapjenku turněra. Finalist Copa América 2022 skedźbni wosebje na so přez spěšnu a technisce naročnu kopańcu. Přiwšěm steješe k přestawce po jědnatce Cataliny Usme (30.) a wrotach Lindy Caicedo (39.) hižo 2:0.

W druhej połojcy wosta při zasłuženym kolumbiskim dobyću. Jedna Južnokorejska koparka pak měješe potom tola hišće přičinu k wjeselu: Casey Phair. W USA rodźena 16lětna bu w 78. min. zaměnjena a je nětko najmłódša hrajerka, kotraž je hdy při jednej WM nastupiła.