Japanska je tež swoju druhu hru na swětowym mišterstwje kopańcy žonow w Awstralskej a Nowoseelandskej bjez wulkeje prócy dobyła. Přećiwo wubrance Kosta Riki bě wona z 2:0 wuspěšna. Do turněra běštej wobě mustwje jara rozdźělnje startowałoj. Mjeztym zo wosta Kosta Rika při 0:3 přećiwo Španiskej přez 90 mjeńšin dospołnje bjez šansy, pokazachu Japanjanki při 5:0 přećiwo Sambiji přeswědčacy wukon. Najebać suwereneho dobyća měješe trenar Futoshi Ikeda štyri změny mjez prěnimi jědnaće hrajerkami. Pola Kosta Riki běštej drje to jenož dwě personelnej, za to pak rozsudna taktiska změna. Poprawom wot niwowa słabše mustwo agěrowaše na hrajnišću bytostnje wyše a spytaše přećiwnika w srjedźnym polu wjazać. Hišće raz nochcychu, zo nastanje poměr na šansach wot 1 k 46, kaž přećiwo Španiskej. 1:0 wobstara potom Hikaru Naomoto, kotraž swjećeše z 29 lětami swój WM debit. Z połlěweje pozicije zapali wona bul mócnje do dołheho róžka (25.). Jenož dwě mjeńšinje pozdźišo slědowaše 2:0.