Marek Krawc rozprawja wo aktualnje rozjimanych temach w Čěskej

Praha. Václav Hora, šef gmejny Vrskmaň w sewjernych Čechach, njewě, hač ma so wjeselić abo hněwać. Steji na kromje brunicoweje jamy, hdźež zažrawaja so ćežke mašiny do krajiny. Na tamnym boku jamy wupřestrěwaja so mjeztym zaso łuki, pola a samo mały lěs, woblubowane wuchodźowanišćo tudyšich wobydlerjow. Tola nowy mały raj ma so bórze zhubić. Na přestrjeni 60 hektarow ma mjenujcy solarna milinarnja nastać. „Gmejna njeje přećiwo wobnowjomnym žórłam energije“, praji Hora. „Smy samo za fotowoltaikowe module, ale nic na tajkej wulkej přestrjeni. Tam je mjeztym wjele škitanych družinow rostlinow a zwěrjatow swój žiwjenski rum namakało a tež wobydlerjo našeje gmejny nochcedźa so toho noweho raja wzdać. Je to přeco to samsne, stat postaja a my přećiwo tomu ničo činić njemóžemy,“ skorži Hora. „Nimo toho so bojimy, zo budu so tam tak mjenowane ćopłotne kupy tworić, kiž budu wokolinu wohrěwać, dokelž su module čorne.“