Basketballisća Serbskeho gymnazija Budyšin (SGB) docpěchu na sakskim finalu starobneje klasy II – 8. do 11. lětnik – wurisanja „Młodźina trenuje za olympiju“ minjeny štwórtk w Kamjenicy 6. městno. Tak postarachu so woni w sportowych stawiznach serbskeho kubłanišća wo wosebity wjeršk.
Optimistiscy běchu sej basketballisća SGB do Kamjenicy dojěli. Před tydźenjomaj dobychu hrajerjo wokoło kapitana Pětra Dźisławka w Lauchhammeru předkoło šulskeho Vattenfalloweho cupa a kwalifikowachu so tak za finale najlěpšich štyrjoch mustwow we Łužicy.
W Kamjenicy wšak hwizdaše nětko cyle hinaši wětřik, wšako bě hrajny niwow wo wjele wyši. Mjez prěnimi štyrjomi zaměstnjenymi šulemi běchu hólcy zasadźeni, kotřiž hewak w swojich zjednoćenstwach za němsku zwjazkowu ligu w swojej starobnej klasy wo dypki wojuja. Tak hrajachu pola pozdźišeho dobyćerja, Sportoweho gymnazija Kamjenica aktiwni basketballisća mustwa Niners Academy, aktualneho druheho zwjazkoweje ligi-wuchod.