„Kulturne herbstwo zwjazuje a twori“ je hesło mjezynarodneho sympozija, kotryž město Budyšin wot wčerawšeho do jutřišeho w Małowjelkowskej sotrowni wuhotuje. Mjez wobdźělnikami je Lubina Malinkowa ze Serbskeho instituta, kotraž poda zawodny přednošk. Bosćan Nawka je so z njej rozmołwjał.

Knjeni Malinkowa, kak byšće zaměr sympozija zjimała?

L. Malinkowa: Mam zarjadowanje za prěni pospyt, stawiznisce wulki wuznam Małeho Wjelkowa za Łužicu runje tak kaž na mjezynarodnej runinje fachowje wobswětlować. Zdobom zmóžnja so šěrši wid na loni do lisćiny swětoweho namrěwstwa UNESCO přiwzate sydlišća Ochranowskeje bratrowskeje jednoty a z nich wurostłe kontakty do cyłeho swěta. Sydlišća kaž Mały Wjelkow abo Niska pokazaja, zo njesteji Ochranow sam. Wšitke tři bratrowske sydlišća tworjachu sylny nabožny centrum we Łužicy a wobwliwowachu Łužiske stawizny bytostnje.

Titul Wašeho přednoška bě „Mały Wjelkow jako kulturne křižnišćo – serbske stawizny w lokalnym a globalnym konteksće“ . Chceće nam tónle kontekst skrótka rozłožić?