W sportowym dźělu smy póndźelu hižo rozprawjeli, zo je Hrubjelčan Kito Budar nowy sakski mišter w trojoboju w sportowej družinje mocosport. 18lětny šuler Serbskeho gymnazija Budyšin startuje za sportowe towarstwo USV TU Drježdźany. Sobotu bě sej w stolicy Sakskeje na krajnym mišterstwje titul sakskeho mištra z cyłkownje 595 zběhnjenymi kilogramami w disciplinach čapawka (202,5 kg), tłóčenje z ławki (127,5 kg) a křižne zběhanje (265 kg) wudobył. Kilian­ Hrjehor je so z Kitom Budarjom rozmołwjał.

W kotrej wahowej klasy sće nastupił a čehodla sće so za tutu rozsudźił?

Sym we wahowej klasy hač do 105 kilogramow startował. Při waženju dźeń do toho pokazowaše waha 103,5 kilogramow. Startuju mjeztym nimale lěto w tutej klasy a sym měnjenja, zo so wona aktualnje najlěpje k mojej wulkosći hodźi. Tak njetrjebam přewjele jěsć, móžu pak přiwšěm dosć muskulatury natwarjeć. Za mnje je to dobry poměr mjez wahu ćěła, masu musklow a wulkosću.

Měješe rozsud za tute wubědźowanje tež strategiski pozadk?