Berlin (dpa/SN). Z přepołoženjom prěnjeje přihotowanskeje jednotki do Litawskeje je zwjazkowa wobora dalšu wažnu kročel k trajacemu zaměstnjenju bojoweje brigady na wuchodnej mjezy NATO zwoprawdźiła. Zakitowanski minister Boris Pistorius (SPD) je dźensa 20 wojakow z wotpowědnym nadawkom do Litawskeje rozžohnował. Fachowcy maja techniske wuměnjenja za přepołoženje dalšich wojakow wutworić.
Reagujo na změnjene wěstotne połoženje w Europje bě zwjazkowe knježerstwo přilubiło, do boja kmanu a samostatnje jednacu wojersku jednotku do Litawskeje přepołožić. Brigada ma po časowym planje hač do lěta 2027 dźěłokmana być. Wotwidźana je stajna prezenca 4 800 wojakow a 200 ciwilnych přistajenych zwjazkoweje wobory, kotřiž móža swoje swójby sobu přinjesć.
Dźensniše přihotowanske komando jědźe zhromadnje z inspekterom wójska, generalnym leutnantom Alfonsom Maisom do Litawskeje. W stolicy Vilniusu witaše němskich wojakow zakitowanski minister Laurynas Kasciunas.
Z receptom za nuklacy ragout warnuja na plakatach při busowych zastanišćach wokoło francoskeho Montpelliera před škodami, kotraž dźiwje nukle tam načinjeja. Jich ličba je minjeny čas widźomnje rozrostła, dokelž je lědma hišće třěleja. Wosebje ratarjo skorža, zo nukle sadźenki truskalcow žeru. Tole tež zahrodki a sportnišća njejsu wěste. Ludźo měli so na to dopominać, kak derje nuklacy ragout słodźi, měšćanosta měni.
70 kilogramow cannabisa w bydlenju měšćanostki sćazała je policije při wulkozasadźenju přećiwo dealerjam drogow w francoskim městačku Avallon. Tež wot měšćanostki wobhospodarjenu apoteku su w tym zwisku přeslědźili. Policija je při tajkich akcijach minjene poł lěta wjace hač 7 000 wikowarjow drogow zajała. Nimo to sćazachu 3,6 tonow drogow, sta bróni a 11,3 miliony eurow.
Drježdźany (dpa/SN). W ruskim chłostanskim lěhwje zemrěty opoziciski politikar Aleksej Nawalny je lawreat lětušeho Drježdźanskeho měroweho myta. Toho wudowa, Julija Nawalnaja, wuznamjenjenje 12. meje w Drježdźanach přijimuje, statne dźiwadło zdźěli. Dalše informacije chcedźa přichodnu póndźelu wozjewić. Nawalny, wjelelětny razny přećiwnik ruskeho prezidenta Wladimira Putina, bě 16. februara w lěhwje w Sibirskej zemrěł.
Strach před wójnu přiběra
Berlin (dpa/SN). Po nadpadźe Ruskeje na Ukrainu je strach ludźi w Němskej před wójnu jasnje přiběrał. W aktualnym woprašowanju sćelaka ARD ma 67 procentow měr a wěstotu w Europje za sylnje abo jara sylnje wohroženu. To je rozrost 28 procentow porno woprašowanju w februaru 2029. Ruska wójna je 21 procentam woprašanych najwjetši problem. Jenož kompleks migracije a ćěkanja je ludźom w Němskej hišće wažniši.
Schröder wumjetuje SPD
Tel Aviv/Washington (dpa/SN). Israel je po raznym warnowanju swojeho najwažnišeho zwjazkarja USA „hnydomne kročele“ k polěpšenju humanitarneje pomocy za ciwilnu ludnosć w Gazaskim pasmje wobzamknył. Wójnski kabinet w Tel Avivje je dźensa rozsudźił, přistaw města Ashdod kaž tež namjezny přechod Erez nachwilnje za transporty pomocnych srědkow wotewrěć, israelske medije rozprawjeja. Po tutym puću chcedźa ludźi na sewjeru Gazskeho pasma lěpje ze žiwidłami zastarać.
We Washingtonje připowědź z Tel Aviva witaja. Zdobom pak žada sej knježerstwo USA zrěčenje mjez Israelom a islamistiskej Hamas k pušćenju zawlečenych israelskich zastajencow. Pječa chcedźa kónc tydźenja wo tym w egyptowskej stolicu Kairu rěčeć.
Prezident USA Joe Biden bě israelskeho ministerskeho prezidenta Benjamina Netanjahuwa wčera doraznje namołwjał, ciwilnej ludnosći Gazaskeho pasma skutkownišo pomhać. USA chcedźa swoju politiku napřećo Israel na tym wusměrić.
Drježdźany (SN). Sakska chce tež lětsa tři wuspěšne programy k spěchowanju wjesnych kónčin dale wjesć. Hłownje chcedźa z pjenjezami za „polěpšenje agrarneje struktury a škita pobrjohow“ (GAK) financować. Wo tym je njedawno statny minister za regionalne wuwiće Thomas Schmidt (CDU) informował.
„Njehladajo na nětko pomjeńšene skrótšenja nimam za prawe, zo so runje při spěchowanju wjesnych kónčin tak masiwnje lutuje“, minister zwurazni. „Inwesticije do perifernych rumow pak nuznje trjebamy. W Sakskej smy so na program dojednali, kotryž ma srědki po doskónčnym wobzamknjenju zwjazkoweho etata rozdźělić. Tak móžemy program ‚witalne wjesne srjedźišća‘, ale tež regionalne budgety dale wjesć. To je ludźom we wjesnych kónčinach jara dobry signal. Za to so tež moje ministerstwo zasadźa“, Schmidt dale praji.