To a tamne (09.04.18)
Jutrowne jejka na parkowace awto mjetali su dźěći w bayerskim Ambergu. Štyri dźěći w starobje jědnaće do 13 lět mjetachu twjerde zwarjene jeja z balkona bydlenja na parkowany wóz, město toho zo bychu je jědli. Při tym nasta wěcna škoda 1 500 eurow, kaž wobsedźer awta trochuje. Hač bě dźěćom prózdnin dla wostudłe abo hač běchu hižo přewjele jejkow jědli, njejsu jemu přeradźili.
Zwada wo městno w sněhakowarskim lifće je so w awstriskim Obertauernje z třomi zranjenymi skónčiła. Tam bě so sydom šulerjow z Wulkeje Britaniskeje z bayerskim nanom a toho 16lětnym synom zwadźiło, dokelž njemóžachu so dojednać, štó smě jako prěni do gondle zalězć. Za čas jězby na horu so dale wadźachu a skónčnje z pjasćemi a kijemi do so bijachu. 16lětny hólc Bayera sej samo łochć złama.
To a tamne (06.04.18)
Dospołnje nimokulił je so pospyt žony, swoje awto w myjerni w frankskim Rothenburgu rjedźić. Jako awtomatiska připrawa hižo dźěłaše, chcyše so wona hišće do awta sydnyć, byrnjež jej to sobudźěłaćerjo zakazali. 47lětna so wobsuny a wosta z nohu mjez wotewrjenymi durjemi a připrawu tčacy. Dokelž njeje so připrawa wotšaltować dała, dyrbjachu wohnjowi wobornicy žonu wuswobodźić. Na awće nasta 2 000 eurow škody, na myjenskej připrawje 300 eurow.
Mylnje kólnju zapalił je 15lětny w Erfurće, jako gril rjedźeše. Prawdźepodobnje njebě wočakował, zo je popjeł tež dźeń po grilowanju přeco hišće žehliwy. Jako jón na kompost ćisny, so hromada zapali. Płomjenja přeskočichu na pódlansku kólnju. Powołanska wohnjowa wobora je podusy. Škoda wučinja 2 000 eurow, młodostny so na zbožo njezrani.
To a tamne (05.04.18)
Pozdatne žałosćenje dźěsća we wotpadkowym kontejneru je w Nürnbergu zasadźenje policije a wohnjoweje wobory zawinowało. Železnicarjo běchu na ranžěrowanskim dwórnišću podhladne zwuki w kontejneru słyšeli, z kotrymž wotpadki transportuja. Na to jón wohnjowi wobornicy z ćežkej techniku wurumowachu a namakachu hrajku, kotraž bě spodźiwne zwuki wot so dawała.
Pjenjezy z parkowanskich awtomatow překřiwił je sobudźěłaćer delnjosakskeho města Bückeburga, a činješe to prawdźepodobnje wjele lět. Doskónčnu škodu měšćanske zarjadnistwo scyła hišće njeznaje. Tuchwilu tam trochuja, zo je jich dohromady něhdźe 30 000 eurow. Muž bě wot lěta 2014 za wuprózdnjenje parkowanskich awtomatow zamołwity. Nosył pak je zwjetša jenož dźěl pjenjez na banku. Kak běchu jeho lepili, nochcyše město zdźělić.
To a tamne (04.04.18)
Ze swojimi myslemi hižo w dowolu při Gardaskim jězoru bě po wšěm zdaću muž ze sewjerohessenskeho Baunatala. Na awtodróhowym zastanišću w bayerskim Holzkirchenje je wón swojej dźowce w starobje dźesać a 14 lět prawdźepodobnje zhubił. Holcy chcyštej jenož na nuznik, štož pak nanej njeprajištej. Tón je tankował, so do awta sydnył a dale jěł. Policija spyta jeho 48 razow telefonisce dosćahnyć, zo by swojej dźowce na wotpočnišću wotewzał. Hakle na Brenneru jemu switaše, zo jej scyła wjace w awće nima.
Apetit na čerstwu zeleninu měještej jutry póndźelu kamelej. W Bremenje stej so skradźu z ležownosće cirkusa wotsaliłoj a sta metrow hač k restawrantej dundałoj. Lóšt na mjaso wšak wegetarianaj njeměještej. Trawa na łuce před hosćencom jimaj dosahaše. Po połhodźinskim wulěće pak jej policija popadny a do cirkusa wróćo dowjedźe.
To a tamne (03.04.18)
Zadwělowany muž je so nětko na policiju wobroćił a wo pomoc prosył. 34lětny njewědźeše sej žaneje rady, kak móhł poćah k žiwjenskej partnerce zakónčić, dokelž so z njej hižo njerozumi. Zastojnica jemu tuž wšelake alternatiwy rozkładźe. Hač je sej wón pokiwy k wutrobje wzał, policiji znate njeje.
Město toho zo by twochnył, je rubježnik na policiju čakał a smě nětko na 15 měsacow do jastwa. Z nabiwanskim kablom handyja wón zak kapy formowaše, zo wupadaše to kaž pistola, a tak hrožeše wobsedźerjej wobchoda. Jako pak so tón z chětro prawdźiwje skutkowacym rewolwrom wobaraše, so nadpadnik cyle spěšnje poda. Wobchodnik jemu namjetowaše: Pak nablaku ćeknje pak z nim hromadźe na policiju čaka. Wudrěwar rozsudźi so za to čakać.
To a tamne (29.03.18)
Razantna jězba z 200 město 100 kilometrow na hodźinu je nětko policiju na sewjeru Hessenskeje zaběrała. 19lětny bě z awtom jězdźidło ciwilneju zastojnikow na zwjazkowej dróze přesćahnył. Smalaka z dalšimaj sobujěducymaj policija wězo hnydom přesćěhowaše a jeho zadźerža. Hladajo na starobu drje šofer hišće dołho jězbnu dowolnosć njewobsedźi. Nětko wšak smě zaso tři měsacy nóžkować.
Postawa, zwobraznjaca naheho prezidenta USA Donalda Trumpa, budźe přesadźowana. Wjacore tajke běchu so za čas wólbow prezidenta w lěće 2016 we wšelakorych městach kraja jewili, prjedy hač je zarjady sćazachu. Jednu tajku figuru pak je awkciski dom Julien’s w Los Angelesu hižo w oktobrje 2016 za 22 000 dolarow wotbył. Nětko nadźijeja so wězo wjace pjenjez, a to hač do 30 000 dolarow.
To a tamne (28.03.18)
Njesměrne zbožo měła je Paris Hilton. Před dnjemi bě wona swój dwaj milionaj eurow drohi pjeršćeń při rejwanju zhubiła. Hektisce su slubjeny Chris Zylka, wěstotni zastojnicy a hosćo w Los-Angeleskim nócnym klubje za nim pytali. Skónčnje jón Zylka w sudobju z lodom nańdźe. Po wšěm zdaću bě 20karatowy ćežki diamant rejwarce z ruki zlećał. Hač drje by jón cuzy namakar wróćił?
Pčołki su wuspěšny wobchodniski model. Tak přenajimaja předewzaća wokoło města Bremena cyłe ludy. Ideja pčolaceho sharinga je, pčołarjam a ratarjam pomhać. Pčołarstwo nima hižo telko financielneho powabka, ratarjo pak trjebaja pčołki za popróšenje. Hdyž rostliny kćěja, dochadźa často k wuskosćam, dokelž njeje dosć pčołkow. Trěbne pčolace ludy móža sej zajimcy nětko wotnajeć.
To a tamne (27.03.18)
„Muski Cinderella“ bě policiji minjeny pjatk w Połčnicy twochnył. Njeznateho z jenož hišće jednym črijom nětko pytaja. Muž bě w kupnicy 27 titkow worješkow družiny Macadamia spakosćił. Jako chcyše jeho filialny nawoda zadźeržeć, njeznaty twochny. Zhubił pak je po puću črij a wjacore titki z worješkow. Tež w Kamjencu je policija paducha lepiła. Wón smědźeše jej dźesać taflow šokolody přepodać a dósta za to chłostanje.
Poprawom měł sobujěducych w ćahu zastarać, město toho pak je so sobudźěłaćer Němskeje železnicy sam posłužował. Natutkany bě pasažěram njedawno w ćahu z Basela do Berlina napadnył. Tuž so hóršachu. Šef ćaha sobudźěłaćerja bistra tuž prošeše na zastanišću w Braunschweigu wulězć, hdźež policisća hižo na njeho čakachu. K jědźi a piću tuž hač do Berlina ničo njedawaše.
To a tamne (26.03.18)
Swój kwas skomdźił je muž ze Schwerina. Njewjesta bě 35lětneho nawoženju policiji jako zhubjeneho přizjewiła, dokelž njebě na jeju wěrowanje přišoł. Kónc tydźenja do toho bě hišće w Sakskej porjadnje z přećelemi swjećił a so tam z časom nježenjenca rozžohnował. Tak je policija tež tam za nim pytała, ale podarmo. Nětko so njewjesta znowa přizjewi. Kaž so wukopa, je muž w psychiatriskej chorowni. Kak bě so do njeje dóstał, wšak wostanje potajnstwo.
Z 48 tonow ćežkim čerwjenym kranom su paduši dźens tydźenja w Stuttgarće twochnyli. Mjeztym su swědcy napadne jězdźidło sta kilometrow dale blisko braniborskeho Herzberga widźeli. Dotal njeje policija skućićelow hišće lepiła. Hdyž skónčnje tak daloko budźe, drje k přesćěhanju njedóńdźe. Wšako kran spěšnišo hač 55 kilometrow na hodźinu njejědźe.
To a tamne (23.03.18)
Wopyt dwaj metraj dołheho warana měješe thailandski wuměnkar w swojej kupjeli. Hač bě so reptil přez kanalizaciju abo prosće přez durje dóstał, njeje jasne. Znajmjeńša tón tam cyle woměrje ležeše. Ale tež 81lětny muž wosta měrny a jeho fotografowaše, prjedy hač durje kupjele zaso začini. Na to zawoła wón fachowcow, kotřiž warana popadnychu a w přirodźe wusadźichu.
Pornografiski film na elektroniskej reklamowej tafli při wulkim křižowanišću w Manili je skandal na přewažnje katolskich Filipinach wuskutkował. Kaž dyrbješe měšćanostka Makati Abigail Binay přiznać, běchu so hackerojo do systema reklamoweje tafle zadobyli a film wusyłali. Po poł minuće drje taflu spěšnje hasnychu, přiwšěm su mnozy pasanća porik při seksu fotografowali abo natočili a to w socialnych medijach wozjewili.
