To a tamne (01.10.24)
Wopačny muzej za padustwo wupytał je sej 35lětny muž w Diusburgu. Muž bě njedźelu rano wokno muzeja rozbił a so do njeho zadobył. Při tym zaskoči alarmowa připrawa. Policija na to twarjenje wobstupi a paducha zaja. W nachribjetniku podhladneho namakachu zastojnicy grat za padustwo, ale žanu rubiznu. To wšak by tež wobćežne było: Muzej je specializowany na wulke a ćežke skulptury. Paduch drje měrješe so na muzejowu kasu. Ta pak bě zrumowana.
W pjanosći z trašawku wokoło so třěleli su třo mužojo w Berlinje. Na to přijědźe specialny komando policije do štwórće Prenzlauskeje hory, po tym zo běchu wobydlerjow wobrónjenych na balkonje wuhladali. Zastojnicy so namócnje do bydlenja zadobychu a muži w starobje 63, 34 a 19 lět zajachu. W bydlenju namakachu pistole, municiju a nože.
To a tamne (30.09.24)
Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.
Turistaj z Vietnama staj tele dny spytałoj z sportowymi črijemi a ćeńkimaj cholowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.
To a tamne (27.09.24)
Mobilne telefony w jastwje předawał je 36lětny justicny zastojnik w Berlinskim jastwje Tegel. Policisća su mjeztym bydlenje zastojnika kaž tež toho běrow w jastwje přepytowali. 36lětny bě policiji napadnył, po tym zo běchu pola jateho namakany handy wuhódnoćili. Mjeztym je dopokazane, zo je 36lětny prawidłownje mobilne telefony a druhe wěcy do jastwa nosył a tam jatym předawał.
Po 47 lětach jastwa je japanske sudnistwo muža wuwinowało, kotrehož běchu na zakładźe wot policije falšowanych dopokazow trójneho mordarstwa dla k smjerći zasudźili. Je to jedyn z najhóršich padow justicnych stawiznow kraja. 47 lět trajaca izolacija w smjertnej celi je dźensa 88lětneho ćělnje a dušinje zlemiła, toho 91lětna sotra rozprawja. Muža běchu 1966 zasudźili a 2014 pušćili. Hakle nětko bu dospołnje rehabilitowany.
To a tamne (26.09.24)
Nimale štyri kilogramy kokaina pokradnył je policist w Jendźelskej z aserwatoweje komory policije, a je drogi z pomocu dealera na dróze předawał. Zastojnik so přeradźi, jako titku z wopojnym jědom před šulu dźowki zhubi. Policista su mjeztym pušćili. Namakana titka wjedźeše zastojnikow do běrowa policista. W toho pisanskim blidźe ležachu dalše titki z kokainom. Na to kokain w składźe wažachu a zwěsćichu, zo retomas sćazaneho wopojneho jěda pobrachuje.
Tójšto stresa ma Berlinska policija připowědźeneho wopyta prezidenta USA Joewa Bidena dla. Planowanja běža hladajo na najwyši schodźenk wohroženja „z najwjetšim wotmachom“, policija zdźěla. Biden chce 10. oktobra krótko do zakónčenja zastojnstwa tři dny do Berlina přijěć. Dny do toho su wjacore demonstracije na dobro Israela a Palestiny planowane.
To a tamne (25.09.24)
Tři měsacy do silwestra je policija prěnje ilegalne praskotaki na pólskej mjezy sćazała. Zastojnicy běchu pólski transporter zadźerželi. Mužej w starobje 30 a 32 lět běštaj po puću do Magdeburga. Při kontroli awta namakachu policisća kartony ze 2 500 tyzami praskotakow z Chiny. Zamołwići trochuja mnóstwo rozbuchliny na znajmjeńša 90 kilogramow. Sćazanu pyrotechniku nětko zniča.
Rekord wopytowarjow wunjesła je lětuša parada daklow w Regensburgu minjenu njedźelu. Cyłkownje 1 175 daklow ze swojimi wobsedźerjemi po měsće ćehnješe. Dźesaćitysacy ludźi 1,8 kilometrow dołhi přećah hač na naměsto před katedralu přewodźachu. Wočakowali běchu 20 000 wopytowarjow. Přišło pak bě telko ludźi, zo njemóžeše jich nichtó zličić, policija zdźěli. Zarjadowarjo pokazuja wosebje na kulturny wuznam dakla.
To a tamne (24.09.24)
Šup je w Ratzeburgu w Schleswigsko-Holsteinskej njewšědne zasadźenje policije zawinił. Zwěrjo bě so njedźelu w spanskej stwě zabarikaděrowało. Do toho bě šup kamor wurumował a z drastami durje blokował. Dokelž njemóžachu wobydlerjo wjace do spanskeje stwy a spodźiwnych zwukow dla wołachu policiju. Wo wućah šupa postara so hajnik. Kak je zwěrjo do domu w Lauenburgskim wokrjesu přišło, njewědźa.
Na wšěch 95 kilogramow kokaina w bananowych kistach namakali su sobudźěłaćerjo wobchoda žiwidłow w Mönchengladbachu w Porynskej. Policisća z toho wuchadźeja, zo su kisty z drogami w hódnoće sydom milionow eurow mylnje do wobchoda dowjezli. Banany z Južneje Ameriki běchu w Antwerpenskim přistawje dojěli. Wot tam běchu je drje mylnje do wobchoda dowjezli.
To a tamne (23.09.24)
Hesło „Hdyž wěra pod kožu dźe“ su někotři po Božej słužbje Osnabrückskeho biskopstwa po słowje brali a sej hišće w cyrkwi křesćanski tattoo kałać dali. Z njewšědnej akciju chcyše biskopstwo wćipnosć ludźi na wěru a katolsku cyrkej zbudźić. Bonifatiusowy skutk katolikow Němskeje je projekt podpěrował.
Myška w pasažěrskim lětadle je pilota nuzowała, so zawróćić a w Kopenhagenje přizemić. Mały hrymzak bě ze zapakowaneje jědźe wuskočił, jako pasažěrow posłužowachu. Na to pilot lětadła předewzaća SAS ludźi informowaše, zo wobhladuja myšku jako wěstotne riziko a zo poleća na přichodne lětanišćo. Tajke postupowanje je pječa normalne. Mašina bě po puću z norwegskeje stolicy Osla do turistiskeho centruma Malaga na juhu Španiskeje. Turisća dolećachu dobrej dwě hodźinje pozdźišo do Španiskeje.
To a tamne (20.09.24)
Bórze je zaso tak daloko a w Mnichowje zahaja oktoberski swjedźeń. Prjedy hač pak jutře prěnje piwo natoča, su sej za modu zajimowani hižo přezjedni, što sej lětsa zwobleku: Dirndl a kožane cholowy. Wosebje pola dirndlow su kóžde lěto hinaše barby a płaty „en vogue“. „Modiske fijałkojte, swětły mint abo želbija, kralowske módre, ćmowe čerwjene“, měni jednaćel předawarja tradicionelnych drastow Angermaier Axel Munz.
Mnohi dešć w zašłych dnjach je entuziastam hribow połne korby wobradźił. Eksperća pak su sej přezjedni, zo drje njebudźe sezona předobra. Fazy spadkow po suchim a horcym lěću njeběchu dołhe dosć, praji Peter Welt, čłon dźěłoweho zjednoćenstwa sakskich fachowcow za hriby. „Za wulku pónoj połnu hribow drje hišće dosahać njebudźe“. Snadź pak so to w běhu nazymy hišće změni.
To a tamne (19.09.24)
Agresiwnej wjewjerčce stej w ćahu w Jendźelskej sobujěducych nadběhowałoj a dospołny chaos načiniłoj. Pasažěrojo dyrbjachu do druhich wagonow ćeknyć. Železnicar durje wagona zamkny, zo njebyštej zwěrjeći hišće wjace njeměra zbudźiłoj. Skónčnje jězbu na lětanišćo Gatwick pola Londona skónčichu a ćah do Readinga wróćo pósłachu. Njeje wuzamknjene, zo su někotři ludźo wjewjerčkow dla swoje lětadło skomdźili.
Tójšto municije z časa Druheje swětoweje wójny namakali su při twarskich dźěłach w bywšej kasernje w Lipsku. Pod zemju chowaše so wjace hač 80 tankowych pjasćow (Panzerfaust) a 1 800 patronow. Fachowcy za znješkódnjenje municije zwěsćichu, zo njemějachu tankowe pjasće zapalak. Dokelž aparaty dalšu municiju w zemi signalizowachu, tam dale pytaja. Ewakuowanje susodow njeje trěbne.
To a tamne (18.09.24)
Tupperware je insolwencu připowědźił. Fachowc tyzow za składowanje žiwidłow z USA chce najebać to dale dźěłać. Tupperware, pioněr na polu domjacych tyzow, bědźi so hižo dlěši čas z hospodarskimi problemami. Minjene měsacy su z pjenjezydawarjemi rěčeli, kotrymž dołži Tupperware hišće wjacore miliony dolarow. Z předaćom zawoda chcedźa mjeno zachować a zawod poněčim na moderne technologije přetwarić.
Při rězanju pjerizny je 71lětny w Rosenbachu w Zhorjelskim wokrjesu bróžnju zapalił. Twarjenje je so póndźelu popołdnju wotpaliło, policija zdźěla. Muž bě wosebity wósk zwohrěwał, z kotrymž chcyše pjerja skotu lěpje wotskubać. Při tym wósk w horncu přeběža a so na płunowych kachlach zapali. Policija trochuje škodu na 7 000 eurow a přepytuje lochkomyslneho zapalerstwa dla.
