To a tamne (14.04.23)

pjatk, 14. apryla 2023 spisane wot:

Kradnjene črije na policajskej straži wotedał je paduch w bayerskim Tirschenreuthće. Do toho bě wón we wobchodźe za twarske maćizny dźěłanske črije wuspytał a so z nimi na nohomaj z wobchoda zminył. Stare črije wostaji stejo. Sobudźěłaćerjo wobchoda móžachu pak jeho z pomocu awtomatiskeje kamery identifikować. Jako muž wot susodow zhoni, zo policija za nim pyta, so na policajskej straži přizjewi. Zastojnicy kradnjene črije sćazachu – a mužej stare přepodachu.

Při wohenju w infračerwjenej sawnje na kromje Mnichowa stej so dwě wosobje z kurom zajědojćiłoj a dyrbještej do chorownje. Elektriska sawna bě so z dotal njeznateje přičiny zapaliła, jako chcyše ju 57lětna žona prěni króć scyła wužiwać. Fachowcy tukaja na techniski defekt. ­Škodu w dospołnje zasazenym bydlenju trochuja na dźesaćtysacy eurow.

To a tamne (13.04.23)

štwórtk, 13. apryla 2023 spisane wot:

Hněwajo so na bywšeho podružnika je wobsedźer domu w bayerskim Rammingenje wobsydstwo muža, kotrež po poł lěće přeco hišće w bydlenju ležeše, na wja­corych městnach w měsće wotpołožił a podružnikej daty pósłał, hdźe wěcy leža. Te wšak běchu spěšnje namakane, mjez druhim wot ludźi, kotřiž policiju wo namakankach informowachu. Policija před tajkimi akcijemi warnuje, pokazujo tež na prawniske konsekwency.

Stražu zwjazkoweje policije w Frank­furće nad Wódru je sej muž wupytał, zo by tam swój mobilny telefon nabiwał – a přińdźe na to do jastwa. Zastojnicy zwěsćichu, zo za mužom wjacorych njeskutkow dla z wukazom zajeća pytaja. Nimo toho je pólskemu staćanej zakazane, do Němskeje přińć. Zastojnicy dowjezechu 37lětneho do jastwa. Swój mobilny telefon muž w jastwje wužiwać njesmě.

To a tamne (12.04.23)

srjeda, 12. apryla 2023 spisane wot:

Zatłusnjena wjewjerčka je jutry pón­dźelu w Dortmundźe zasadźenje wohnjoweje wobory zawinowała. Žona bě při přechodźowanju zwěrjo we wěku gullyja wuhladała. Podarmo wona spyta, wjewjerčku sama wuswobodźić. Na to wo­łaše wohnjowu woboru. Pomocnicy ­mějachu swoju lubu nuzu, dokelž „njebě rozpjeršena wjewjerčka kooperatiwna“. Skónčnje so akcija tola poradźi. Mały hrymzak zminy so na přichodny štom.

Z wjace hač 200 km/h je šofer w Badensko-Württembergskej spytał, so kontroli policije wuwinyć. Skónčnje jeho zastojnicy na štomje zajachu. 48lětny bě na nócnej honjeńcy zdźěla bjez swěcy jěł a njejapce borzdźił, zo by zražku z policajskim awtom prowokował. Na kóncu muž pěši ćěkaše. Helikopter policije jeho skónčnje na štomje sedźo wuhlada, sobujěducy chowaše so w kerku. Muž bě wopity.

To a tamne (11.04.23)

wutora, 11. apryla 2023 spisane wot:

Mjeztym hižo třeći raz je so 78lětna žona w USA do banki zadobyła. Kaž nowina The Kansas City Star nětko rozprawja, je ju policija po tym zajała. Minjenu srjedu bě wona maskěrowana do banki zastu­piła, za pjenjezami žadała a so pola při­stajeneje zamołwiła, dokelž je ju tak ­nastróžiła. Jako ju zastojnicy na parkowanišću lepichu, zwěsćichu, zo bě staruška trochu wjele alkohola piła. Po rozprawje nowiny bě 78lětna hižo raz w lětomaj 1977 a 2020 spytała banku wurubić. ­Hakle loni nazymu je na pruwowanje wusadźene chłostanje kónčiło.

Z přetwarjenym kófrom ze złotom w hódnoće 24 000 eurow je muž spytał do Indiskeje zapućować. Tak je wón dźěle kófra kaž na přikład šruby ze złota wuhotował, informowaše wčera indiska powěsćernja ANI. Cłownicy pak su wobšudnistwo pytnyli.

To a tamne (06.04.23)

štwórtk, 06. apryla 2023 spisane wot:

Dokelž njeměješe 11lětna holca prawdźepodobnje wjace lóšt, ze swójbnym psom so wuchodźować, je wona psa prosće bjez wědźenja staršeju cuzemu na dróze předała. Nan holcy přizjewi pad policiji. Minjenu póndźelu bě holca w Landshuće z Yorkshire-terrierom po puću a narěča cuzeho, hač chce psa za něšto stow eurow kupić. Nimo rjaneho fenka pak ma 11lětna wulke mjerzanje ze staršimaj, kotrajž nětko za njeznatym kupcom pytataj. Policija jimaj pomhać njemóže.

Pilot w Južnej Africe dožiwi na lěće 3 300 metrow wysoko njeluboznu překwapjenku. Dokelž bě pytnył, zo so ­jeho naraz něšto „zymneho“ dótkny, ­wuhlada pod swojim sydłom jědojtu ­kobru. Pilot so tuž rozsudźi spěšnje ­na přichodnym lětanišću přizemić. ­Wón a štyrjo pasažěrojo mjeńšeje ma­šiny móžachu so wuchować. Njelu­bozny hósć, kobra, wšak bě so mjeztym zmi­nył.

To a tamne (05.04.23)

srjeda, 05. apryla 2023 spisane wot:

Dokelž chcyše muž w Praze přitulnu ­atmosferu w swojej bydlenskej stwě měć, je na swojim telewizoru widejo kaminoweho wohenja nastajił. Kedźbliwy susod pak zawoła wohenja w stwě dla wohnjowu woboru, kotraž je hnydom reagowała a jězdźidło na přizjewjene městno pósłała. Kaž wobornik w stolicy Čěskeje wčera zdźěli, wšak bě to njetrjebawši alarm. Při­wšěm chwala sej tajkich kedźbliwych susodow, wšako móhło tomu tež hinak być.

Betty Buckland w šotiskim Edingburgh je sej nětko són spjelniła. Zhromadnje z nazhonitym pilotom je 93lětna hišće raz sama z lětadłom lećała. Z 240 kilometrami na hodźinu a 600 metrow wysoko zemje lećeć bě jej wulkotne dožiwjenje. Buckland njeje prěni raz za wodźidłom lětadła sedźała. W lěćnych prózdninach přebywaše často pola přiwuznych w USA, hdźež měješe z kuzenkom móžnosć lećeć.

To a tamne (04.04.23)

wutora, 04. apryla 2023 spisane wot:

Policija měješe 77lětneho muža dla trochu dlěšu honjeńcu. W Braniborskej bě wón njezbožo zawinił a z městna njeskutka přez Saksko-Anhaltsku do Sakskeje ćeknył. Na zwjazkowej awtodróze A 9 blisko Lipska su zastojnicy jeho skónčnje zadźerželi, policija dźensa zdźěli. Tola 77lětny nochcyše so podwolić a hrozyše z rozbuchlinu, kotryž měješe w dwěmaj kófromaj w awće. Kaž so wukopa, tomu tak njebě. Muža dowjezechu skónčnje do psychiatriskeje chorownje.

Kuntwory su najwjac ludźom w lěću njepřećel. Tola Doreen Werner z Leibnizoweho centruma w Müncheberg so tele dny jara wjeseli. Kuntwory maja lětsa dobre wuměnjenja so wuwiwać. Tak lubuja włóžnotu a ćopłotu. Dešća drje mějachmy w nalěću dosć a tuž móža jejka we łužach abo włóžnej zemi wotkładować. Nětko su hišće ćopliše temperatury trěbne.

To a tamne (03.04.23)

póndźela, 03. apryla 2023 spisane wot:

W Japanskej móža sej ludźo najwšelakoriše produkty w awtomatach kupić. Nimo kofeja, poliwkow abo čaja poskićuja w awtomatach nětko tež mjaso wjel­rybow. Na sewjeru kraja steji nětko dalši nastroj z njewšědnymi wudźěłkami. Tak předawaja na dwórnišću města Akita mjaso mjedwjedźow, zdźěli dźensa dźenik Mainichi Shimbun.

Kóčka je při padustwje do bydlenskeho woza blisko Brandenburga nad Habolu panisce reagowała a mějićelow wubudźiła. Dotal njeznata ličba skućićelow zadoby so zawčerawšim rano do jězdźidła. Swójba na parkowanišću runje spaše. Njeznaći pokradnychu pjenjezy a kameru. Kóčka dósta paniku a wubudźi swójbu, kotraž policiju zazwoni.

To a tamne (31.03.23)

pjatk, 31. měrca 2023 spisane wot:

Najebać to, zo njeměješe žona w Čěskej kwalifikaciju za powołanje, je wosom lět jako nawodnica zakładneje šule dźěłała. Při požadanju bě wona wopačne certifikaty předpołožiła, zdźěli wčera rěčnica policije. Starši šulerjow kubłanišća w Libcice na Vltavou mějachu podhlad, zo žona kmanosće za nawjedowacu funkciju nima a so na zarjady wobroćichu. Po přepruwowanju bě jasne, zo njeje žona nihdy na Karlowej uniwersiće w Praze studowała. Nětko hroža jej wosom lět jastwa, dokelž je wona wopisma sfalšowała.

Po oficialnym ličenju je w Słowakskej něhdźe 1 200 mjedwjedźow zadomjenych. Stajnje zaso ludźo w přirodźe mjedwjedźa zetkaja, štož móže fatalny wukónc měć. Hakle wčera policija zdźěli, zo je 180 kilogramow ćežke zwěrjo lěsneho dźěłaćerja w gmejnje Nedožery-Brezany nadpadnyło.

To a tamne (30.03.23)

štwórtk, 30. měrca 2023 spisane wot:

Jedyn milion puntow – abo tola jenož dźesać – dobyła je žona při loteriji we Wulkej Britaniskej a skorži tohodla před sudnistwom. Žona bě sej pjećpuntowski lisćik za loteriju při awtomaće kupiła. Nastroj pokaza žonje dobyće miliona puntow a wokomiki pozdźišo jenož hišće dźesać. Mějićel nastroja rěči wo techniskim zmylku, žona pak žada sej sumu, kiž bě jej awtomat spočatnje pokazał.

Přećiwo zwobraznjenju nahich čłowjekow we wuměłskich twórbach wjetšina ludźi w Němskej ničo nima. 78 procentow nima za problematiske, dźěćom twórby wuznamnych wuměłcow kaž Michelangela, Rubensa abo Rembrandta pokazać. Tole je woprašowanje wunjesło. Pozadk je dóńt wučerki w Floridźe, kotruž běchu pušćili, po tym zo bě we wučbje dźěćom foto sławneje postawy Michelangela „David“ pokazała. Na to běchu so starši hóršili.

Serbska debata

nowostki LND