Třižonjanski jězor – wočerstwjenišćo z dwěmaj wobličomaj
W jězoru pola Łaza a Běłeho Chołmca běchu wot lěta 2008 šěsnaće wšelakich družin rybow zwěsćili. Někotre wubrane wobłuki su tuž za wudźenski sport rezerwowali. Z jězorom reguluja tohorunja staw wody Małeje Sprjewje.Rozdźělnišej njemóžetej přibrjohaj při Třižonjanskim jězoru być: Pola Łaza knježi skerje ćišina, blisko Běłeho Chołmca pak móža dowolnicy po wječorach a nocach k wšelakej hudźbje porjadnje hejsować. Runja swojim „bratram a sotram“ we łužiskej jězorinje nasta Třižonjanski ze zapławjeneje jamy, z kotrejež běchu wot lěta 1984 do měrca 1989 něhdźe štyrnaće milionow tonow brunicy wuryli. Swoje mjeno ma jězor wot Łazowskeho wjesneho dźěla Tři Žony w sewjernym dźělu přibrjoha. Po tym zo bě woda Małeje Sprjewje zbywacu dźěru šěsć lět pjelniła, je Łužiska a srjedźoněmska towaršnosć hórnistwoweho zarjadnistwa LMBV wočerstwjenišćo w lěće 2009 Łazowskej gmejnje přepodała.
