Na 10. mjezynarodnu wuměłsku dźěłarničku w překrasnej přirodnej kulisy Miłočanskeje skały zhladowane
Ekstremnišu njemóžeš sej atmosferu wokoło Krabatoweho kamjenja, na połpuću mjez Krěpjecami a Miłoćicami ležaceho, předstajić. Štyrnaće dnjow – kónc awgusta/spočatk septembra – je tu dźesać wuměłcow akademiskeho formata ze štyrjoch narodow 10. mjezynarodnu dźěłarničku postajało. Třo dalši z Łužicy so jim přidružichu a zamóchu tohorunja wirtuoznje z drjewom wobchadźeć. Z hamorom a błóckom zadobywachu so akterojo při swojim filigranym dźěle do wuzwolenych zornowcowych kruchow. Do toho pak bě hara jich pneumatiskich hamorow daloko słyšeć. Slědowace dny mějachu wuměłcy z drišćacymi kutowymi točakami, znate pod mjenom Flex, połnej ruce dźěła. Do wjacehłósneho chóra dźěłowych gratow zarjadowachu so rjećazowe piły drjeworězbarjow. W tymle disharmoniskim koncerće je šumjenje metalotwórcow lědma napadnyło.
